TIRANË- Prokuroria për Krime të Rënda përfundon hetimet për avionin me drogë të rrëzuar në plazhin e Divjakës. Po ashtu organi i akuzës ka dërguar për gjykim kërkesën për 7 persona, të akuzuar për trafik lëndësh narkotike, në tentativë. Ata tentuan të trafikojnë drejt Italisë rreth 300 kilogramë canabis sattiva nëpërmjet avionit tip « Piper », i cili, në datë 10.05.2014, ra në plazhin e Divjakës. Avioni u gjet me një rrotë të thyer, në pamundësi për t’u ngritur.

Në përfundim të hetimeve, Prokuroria për Krime të Rënda dërgon për gjykim shtetasit :

Giorgio Riformato, hetuar me masë sigurimi « arrest në burg »
Sajmir Bajrami, hetuar me masë sigurimi « arrest në burg »
Mareglen Ymeraj, hetuar me masë sigurimi « arrest në burg » në mungesë
Kristian Demçe, hetuar me masë sigurimi « arrest në burg » në mungesë
Kleviol Ahmeti, hetuar me masë sigurimi « arrest në burg »
Aurel Pupe, hetuar me masë sigurimi « arrest në burg »
Orgest Bilbili, hetuar me masë sigurimi « arrest në burg » në mungesë

Në bazë të hetimit, ka rezultuar se shtetasit Sajmir Bajrami dhe Giorgio Riformato kanë hyrë nga Italia në Shqipëri pak ditë para ngjarjes dhe, nëpërmjet bashkë të pandehurve të tjerë, dyshohet se kanë siguruar lëndën narkotike, të cilat do ta trafikonin drejt Italisë nëpërmjet një avioni sportiv, të drejtuar nga piloti Riformato.

Në datë 10.05.2014, avioni i drejtuar nga shtetasi Riformato është gjetur i ulur në zonën e plazhit të Divjakës, me një rrotë të thyer, në pamundësi për t’u ngritur. Pranë avionit, nga ana e forcave të policisë, janë gjetur disa çanta, në përbërje të të cilave sipas ekspertizës së mëvonshme, rezultonte se ishin 94 kilogramë lëndë narkotike canabis sattiva. Në vijim të veprimeve policore, u arrit të zbuloheshin edhe disa çanta të tjera, në një rrugë në afërsi të vendit ku gjendej avioni, në automjetin tip Mitsubishi të drejtuar prej Sajmir Bajramit. Nga ekspertiza e kryer mbi lëndën e gjetur në këto çanta rezultoi se ishte lëndë narkotike canabis, me peshë 211.8 kg.

Pas veprimeve hetimore paraprake, është kryer arrestimi i shtetasve Giorgio Riformato dhe Sajmir Bajrami. Më pas, në vijim të hetimeve të zhvilluara nga ana e Prokurorisë për Krime të Rënda, në bashkëpunim me Policinë e Shtetit, u arrit të identifikoheshin edhe bashkëpunëtorët e tjerë të këtyre dy personave, për të cilët po dërgohet bashkërisht kërkesa për gjykim.

Ndërkohë, ky procedim penal është ndarë dhe po vijojnë hetime të mëtejshme për persona të tjerë të përfshirë.

(ma.ar/BalkanWeb)

Për t’u bërë pjesë e grupit "Balkanweb" mjafton të klikoni: Join Group dhe kërkesa do t’ju aprovohet menjëherë. Grupi Balkanweb
Etiketa: