Kreu i Partisë Demokratike, Lulzim Basha, zbardh detaje nga takimi me ambasadoren e re të SHBA, Yuri Kim.
Përmes një mesazhi në “Facebook”, Basha thekson se i ka garantuar ambasadores Kim angazhimin e plotë dhe serioz të PD në zbatimin e reformave dhe zgjidhjen e krizës politike.
Më tej, kreu i PD shton se SHBA do të vazhdojë të jetë në krah të popullit shqiptar, siç ka bërë edhe më parë.
“Kënaqësi e veçantë të mirëpres Znj. Yuri Kim, Ambasadoren e SHBA, aleatit dhe partnerit tonë strategjik. E urova Ambasadoren Kim për detyrën e re dhe e sigurova atë për bashkëpunim të plotë të opozitës në përmbushjen e të gjithë angazhimeve të vendit tonë me SHBA.
Ndava me të pikëpamjet për zhvillimet e fundit në Shqipëri dhe e garantova për angazhimin e plotë dhe serioz të PD në zbatimin e reformave dhe zgjidhjen e krizës politike.
Shtetet e Bashkuara të Amerikës do të vazhdojnë të jenë në krah të popullit shqiptar ashtu siç kanë bërë gjatë gjithë historisë së marrdhënieve të shkëlyqera mes dy vendeve tona”, shkruan Basha.
(BalkanWeb)
