NGA OLA MITRE*
TIRANË- Zonjë”, – më drejtohet një vajzë e re sapo dola nga Zyra e Informimit për Qytetarët, pranë Bashkisë së Tiranës. “A mund t’ju pyesim për mendimin tuaj rreth cilësisë së shërbimit që sapo morët në sportel?”. Fillimisht hezitova. Jo për pyetjen që më bëri vajza, por për faktin se dikush po interesohej për diçka të tillë. Sigurisht që kurioziteti (i gazetares) më shtyu të pyes rreth arsyeve se përse vajza e dëshironte këtë informacion.
“Jemi ngarkuar nga bashkia për të pyetur qytetarët dhe për të kuptuar perceptimin e tyre për shërbimin pranë zyrës së informimit dhe problematikave që ata hasin”, – u shpreh punonjësja. Gjatë fushatës elektorale për zgjedhjet vendore, e kisha dëgjuar shpesh kryebashkiakun aktual, Erion Veliaj të premtonte se do të dëgjonte zërin qytetar, por nëse nuk do të ndodhesha si qytetare në atë zyrë, sigurisht që nuk do e kisha besuar tërësisht.
Përmes këtij anketimi, një numër i caktuar qytetarësh do të merren në pyetje sapo të përfundojnë marrjen e shërbimit në Zyrën e Informimit për Qytetarët, e më pas do të hartohet një raport i plotë rreth problematikave që ata raportojnë, në mënyrë që të ndërmerren hapat konkretë për t’i ‘riparuar’. Pyetësori përfshinte pyetje, që lidheshin me pastërtinë në zyrë, komoditetin, kohën e pritjes në radhë, e deri te mënyra e shërbimit të punonjëseve prapa sportelit.
Sigurisht, gjatë kohës së pritjes, i kisha vënë re ca detaje. Më qëlloi që edhe një javë më parë të kisha marrë shërbim në të njëjtën zyrë e, për hir të së vërtetës, ajër të kondicionuar nuk kishte. Vapa të vështirësonte edhe më shumë pritjen në radhë, ndërsa dje jo. Kondicioneri ishte vënë në funksionim, çka ndikonte ndjeshëm në një pritje më normale. Sigurisht që këtë ia raportova punonjëses, ndonëse mendova se vënia në punë e tij lidhej pikërisht me anketimin. Megjithatë, nuk mund të heshtja për tabelën e biletave, e cila nuk funksiononte.
Gjithkush që hynte do të duhej të rregullohej me njëri-tjetrin për të mbajtur radhën, e nëse nuk memorizoje “të fundit”, rrezikoje të hyje në konflikt. Funksioni i tabelës së biletave, që mundëson marrjen e një numri të caktuar e që më pas thirret nga sportelisti kur ai lirohet, pa dyshim do të shmangë situatat aspak të këndshme. Sigurisht që kisha vënë re edhe se disa prej karrigeve, ku uleshin qytetarët në momentin e marrjes së shërbimit në sportel, ishin gjysmë të thyera e ndonjë qytetar mund të rrezikonte të binte teksa ulej. Sa u takon punonjëseve, shërbimi ishte krejt normal (p.s.: ndoshta pak më të buzëqeshura se më parë).
Gjithçka thashë u mbajt shënim në formular, ndërsa vajza më siguroi se gjithçka do të pasqyrohej në raportin përfundimtar që do të hartohej. Ndonëse në dukje jo të rëndësishme, detaje të tilla të bëjnë të besosh se zëri yt dëgjohet. Sigurisht, bëhet fjalë për shërbime që lehtësisht mund të ndryshohen nga Bashkia e Tiranës. Megjithatë, si qytetare e kryeqytetit do të doja shumë që nisma të tilla të vazhdonin edhe në të ardhmen. Sigurisht, për projekte të mëdha që do të ndërmerren në qytet e që ndikojnë drejtpërdrejt në ndryshimin e cilësisë (për mirë apo për keq) të jetës.
(m.k/GazetaShqiptare/BalkanWeb)
