Ish-kryeministri Sali Berisha ka nisur takimin në Qarkun e Kukësit në kuadër të fushatës për zgjedhjen e kryetarit të ri të Partisë Demokratike.

Gjatë fjalës së tij në çelje të takimit, ish-kryeministri ka rreshtuar rrethanat në të cilat Partisë Demokratike i është dashur që të punojë në mënyrë që të arrijë rithemelimin e partisë.

Berisha ka theksuar se iu është dashur që të luftojnë jo vetëm kundër qeverisë dhe ish kryetarin Lulziim Basha, por edhe kundër George Soros, i cili kërkoi dhe kërkon sipas tij që Partinë Demokratike ta kthejë në një shoqe besnike të qeverisë dhe jo të qytetarëve dhe demokratëve.

“Ju përshëndes dhe ju shpreh ju demokratë të Kukësit, mirënjohjen më të thellë për mbështetjen e jashtëzakonshme që i keni dhënë PD për qendrimin tuaj të pagabueshëm ndaj interesit kombëtar, për atdhetarinë tuaj të palëkundur dhe tu garantoj se mblidhemi sot në këtë sallë më të fuqishëm se kurrë ndonjëherë më parë pasi për muaj të tërë së bashku udhëtuam në një rrugë plot vështirësi, plot pengesa por bëmë gjithçka para së gjithash dhe mbi të gjitha që të ishim opozitë e vërtetë e këtij vendi.
Në rrugën tonë kaluar vështirësi. Asnjë opozitë në Europë nuk ka njohur e kaluar vështirësitë që kaloi PD nga shtatori deri sot.

Përpjekje të mëdha djallëzore antikombëtare antidemokratike u bënë që kjo forcë politike të mbetej opozitë e rreme, pseudo opozitë dhe shqiptarët të kalonin nga pluralizmi i vërtetë politik në pluralizmin burokratik fals. Në këtë përpjekje kreu i qeverisë së sotme nuk kurseu asgjë, për realizimin e projektit të Shqipërisë me opozitë false. Nuk kurseu asgjë për mposhtjen përfundimtare të PD.

Ai përdor çdo mjet të një shteti pa ligj e moral të gjitha format e joshjes e presioneve, një qendrim të tillë nuk mbajti as diktatori i fundit shqiptar Ramiz Alia pas themelimit të PD.

Në udhën tonë, kundra nesh u rreshtuar lidershipi, ish kryetari i PD, por jo vetëm ai. Të cilët të lidhur me një mijë fije me qeverinë, pas shpinës tuaj, në kurriz tuaj, bënë gjithçka që të mposhtin përpjekjen tonë për të rithemeluar PD.
E vërteta e pamohueshme është se në krah të tyre qendroi fuqishëm edhe mafia e George Soros që kërkoi dhe kërkon që të djathtës shqiptare t’i emërojë kryetarin e saj e ta shndërrojë në një shoqe besnike të qeverisë, jo të qytetarëve.

U ndala në këto rrethana për të theksuar se në çfarë kushtesh ne dolëm të ngrihemi. Ne ecëm pandalshëm dhe sot ne finalizojmë së shpejti procesin e rithemelimit të PD të bazuar në votën tuaj të lirë, në vullnetin e lirë të bazuar në vlerat kombëtare për të cilat shqiptarët kanë punuar e sakrifikuar më shumë se kombet e tjera.

(BalkanWeb)

Për t’u bërë pjesë e grupit "Balkanweb" mjafton të klikoni: Join Group dhe kërkesa do t’ju aprovohet menjëherë. Grupi Balkanweb