Politilogu Roland Lami dhe kryeredaktori i Gazetës Shqiptare Erl Murati kanë diskutuar në emisionin “Real Story” në “News 24” në lidhje me faktin që SHBA shpalli non grata ish-kryeministrin Sali Berisha.
Lami theksoi se e vetmja shpresë e Shqipërisë mbetet faktori ndërkombëtar, ndërsa Murati vlerësoi se çdo politikani të korruptuar duhet t’i konfiskohet pasuria.
Roland Lami: Unë mendoj se qëndrimi i SHBA justifikohet. Berisha e ka mbyllur procesin e pushtetit që më 2013. Pse tani? Kjo sepse fillimisht kemi reformën të investuar nga SHBA e shpresat janë tek SPAK, si në Rumani e Kroaci. Mirëpo, reforma ka gjetur edhe një kontekst shqiptar. SPAK merret vetëm me peshqit e vegjël. Tjetër ndodhi është se PD nuk njohu zgjedhjet. Së treti, në PD ka një zhvillim, një nxitim të frikshëm që të mbyllet gara dhe të legjitimohet Basha, e kjo mund të ndodhë sepse është kapur peng nga Berisha ose nuk mendohet ndryshe si mund të funksionojë PD. E vetmja shpresë e Shqipërisë mbetet faktori ndërkombëtar.
Erl Murati: Berisha është njeriu simnol i historisë së politikës së tranzicionit shqiptar. Berisha është ai që konsiderohet si peshk i madh në vend. Berisha pra dyshohet si peshk i madh dhe ky është hap i rëndësishëm. Sali Berisha nuk është politikani i parë që akuzohet nga SHBA, janë edhe disa të tjerë, madje edhe nga PS. Për mua, drejtësi është kur pasuria e politikanëve t’i konfiskohet dhe t’i kthehet popullit shqiptar. Unë uroj që çdo politikani të korruptuar t’i konfiskohet pasuria. Sigurisht, që është vendim i fortë politik.
Pse ndodh tani? Vërtetë që Berisha është tërhequr nga PD, por përpara dy vitesh, mbledhjet e Partisë Demokratike mbylleshin me fjalët e tij. Berisha ka pasur qëndrime edhe të ndryshme nga SHBA. Për të dalë nga parlamenti PD, e ka thënë i pari Sali Berisha. Berisha ka thënë se zgjedhjet me Ramën kryeministër nuk fitohen. Për reformën në drejtësi, në momente të caktuara, Berisha ka atakuar mënyrën si është bërë reforma.
(Balkanweb)