TIRANE- Edhe gjatë ditës së sotme ka vijuar operacioni “Blici Rrugor”, i shtrirë në 12 qarqet e vendit, në akset kryesore dhe zonat urbane.
Aksioni për vendosjen e rripit të sigurimit dhe mos përdorimin e celularit gjatë drejtimit të mjetit, nisi në orën 12:00 dhe zgjati deri në orën 13:00.
Për realizimin e këtij operacioni, ditën e sotme u angazhuan rreth 770 punonjës Policie në total, si dhe u ngritën dhe funksionuan 155 pika kontrolli në të gjithë vendin.
Prej orës 12:00 deri në orën 13:00 në të gjithë vendin, Policia Rrugore e mbështetur dhe nga Patrullat e Përgjithshme dhe Shqiponjat vendosën:
211 masa administrative për mosvendosje të rripit të sigurimit.
164 masa administrative për përdorim të celularit gjatë drejtimit të mjetit.
Si dhe 248 masa administrative për shkelje të tjera, si shpejtësi tej normave të lejuara, për mosvendosje të kaskës mbrojtëse etj.
Policia thekson se operacioni ka për qëllim rritjen e parametrave të sigurisë rrugore, ndërgjegjësimin e qytetarëve për rëndësinë e vendosjes së rripit të sigurimit, për mos përdorimin e celularit gjatë drejtimit të mjetit por edhe të respektimit të rregullave të qarkullimit rrugor në tërësi.
(el.sp/BalkanWeb)
