Referendumet e rreme të Kremlinit janë një përpjekje e kotë për të maskuar atë që përbën një përpjekje të mëtejshme për një rrëmbim toke në Ukrainë, tha Sekretarit të Shtetit të SHBA, Antony Blinken.
“Për të qenë i qartë: rezultatet u orkestruan në Moskë dhe nuk pasqyrojnë vullnetin e popullit të Ukrainës”, tha Blinken.
“Shtetet e Bashkuara nuk e njohin dhe nuk do ta njohin kurrë legjitimitetin ose rezultatin e këtyre referendumeve të rreme ose aneksimit të supozuar të Rusisë të territorit ukrainas,” theksoi kryediplomati amerikan. “Ky spektakël i kryer nga përfaqësuesit e Rusisë është i paligjshëm dhe shkel ligjin ndërkombëtar”.
Ai shtoi se “është një fyerje ndaj parimeve të paqes dhe sigurisë ndërkombëtare”.
Shefi i diplomacisë amerikane vuri në dukje se Rusia kishte detyruar një pjesë të madhe të popullsisë në zonat e pushtuara të iknin dhe i detyroi qytetarët e Ukrainës që mbetën të votonin nën kërcënimin e armëve, nga frika për sigurinë e tyre dhe sigurinë e të dashurve të tyre.
“Populli i Ukrainës ka shprehur vazhdimisht dëshirën e tij për një të ardhme të lirë dhe demokratike. Ata duan që vendi i tyre të mbetet i pavarur dhe sovran”, theksoi Blinken.
“Shtetet e Bashkuara dhe aleatët dhe partnerët tanë do të vazhdojnë të ndihmojnë Ukrainën në luftën e saj për të mbrojtur territorin e saj kundër agresionit rus. Ne mbështesim me gjithë zemër unitetin, sovranitetin, pavarësinë dhe integritetin territorial të Ukrainës brenda kufijve të saj të njohur ndërkombëtarisht”, tha Sekretari amerikan i Shtetit.
Më 23-27 shtator, administratat pushtuese ruse në territoret e pushtuara përkohësisht të rajoneve të Ukrainës Luhansk, Donetsk, Kherson dhe Zaporizhia mbajtën referendume të rreme për pranimin e këtyre zonave në Rusi.
Shtëpia e Bardhë ka deklaruar vazhdimisht se SHBA nuk do ta njohë kurrë rezultatin e këtyre spektakleve.