TIRANE- Pas shembjes së godinës 5-katëshe pranë Fakultetit të Ekonomisë ka reaguar Partia Demokratike. Në një deklaratë për mediat, Gerti Bogdani tha se prioritet i kryeministrit Rama është “tritoli dhe shembja e ndërtesave”. Bogdani tha se vetë Rama, gjatë kohës që ishte kryetar Bashkie në Tiranë, i kishte dhënë leje ndërtesës 5-katëshe e cila u shemb sot.
JA DEKLARATA E PLOTË E GERTI BOGDANIT:
Sot pamë se prioritetet e vërteta të Edi Ramës nuk janë krijimi i më shumë vendeve të punës, por tritoli dhe shkatërrimi i ndërtesave për të cilat ai vetë ka dhënë leje.
Dje, si kryebashkiak, Rama dha lejen e ndërtimit.
Sot si kryeministër, ai i dëmshpërbleu me paratë e qytetarëve. Dhe përsëri përdori po me paratë e taksave tona për ta shpërthyer e hedhur në tokë ndërtesën.
Ja ku është këtu leja e ndërtimit e firmosur nga vetë Edi Rama.
Kush do ta pastrojë këtë katrahurë? Kush do të mbajë përgjegjësi për këtë dëm të lejuar, të zhvilluar e së fundmi të prishur nga vetë Edi Rama.
A do të mbajë ai përgjegjësi për trillet e tij që i kushtojnë taksave të qytetarëve? A do të mbajë ai përgjegjësi për lejet e dyshimta që vetë ka dhënë, e që sot i hedh në erë me tritol? Për mbarë qytetarët tashmë është e qartë se kush është kryeministri i vendit.
Koha për përgjigjen qytetare po afron.
(el.sp/BalkanWeb)
