Profesorët Shezai Rrokaj dhe Anila Kananaj kanë promovuar dy fjalorë të gjuhës shqipe, njëri për moshat 5 deri 11 vjeç dhe tjetri për moshat mbi 12 vjeç. Botimet janë fryt i punës 7-vjeçare të dy gjuhëtarëve, me synim shmangien e fjalëve të huaja kur është e mundur dhe mësimin e standardit të shqipes.

“Është gjë e re që nuk ka qenë dhe për të cilën shkolla ka shumë nevojë. Fashat moshore që nga mosha 5 vjec deri në 16-17 vjeç por edhe më tej se kaq, e kishin shumë të vështirë qoftë konceptualisht, qoftë edhe për ta shfrytëzuar, fjalorët e mëdhenj që ekzistojnë”, tha Rrokaj.

Megjithëse janë botime kushtuar të vegjëlve kopjet e para nuk janë në shitje dhe as në shkolla. Që librat të shkojnë te fëmijët dhe mësuesit, do të duhet një projekt i Ministrisë së Arsimit, buxhet. E njëjta gjë për një format elektronik.

“Ky është mjet pune në klasë. Pra mësuesi e merr dhe e ka mjet pune. Ky libër është vetëm për promovim. Mendoj se Ministria, siç mbështeti financiarisht botimin e tij, do të mbështesë edhe për ta bërë të aksesueshëm”, u shpreh tha Rrokaj.

I pyetur për një format elektronik, Rrokaj tha: I kemi të gjitha të menduara dhe gati, që do të thotë se në momentin që do të krijohen financat e nevosjhem. Ju e dini mundësitë e financat që kanë profesorët, ne kemi mendjen të pasur, jo xhepin.

Njëri prej dy botimeve është me ilustrime me 6500 zëra, ndërsa tjetri ka rreth 10 mijë fjalë. Veç fëmijëve shqiptarë brenda dhe jashtë vendit, fjalorët mund të ndohmojnë edhe të huajt që duan të mësojnë gjuhën shqipe.