Edhe pse opozita edhe këtë të enjte ka bojkotuar seancën plenare, në mungesë të saj, zërin kritik në parlament e ka bërë deputeti socialist Erion Brace. Në nisje të seancës Brace u shpreh se prej javësh kërkon interpelancë me ministrin Ahmetaj në lidhje me ligjin e sportit.
“Prej pesë javësh kam kërkuar një interpelancë ministrit të financave. Ligji e parashikon qartë se ministri duhet që të përgjigjet brenda tre javëve. Pra kanë kaluar dy javë nga afati dhe ministri ende nuk përgjigjet, po e përsëris është neni 80 i kushtetutës, dhe jo neni 80 i dëshirave të mia. Nëse unë e kam seriozisht punën time duke komunikuar me shkresa me ministrin, ai nuk e mendon njësoj duke u tallur me kërkesat e mia serioze”, theksoi Braçe.
Kërkesës së socialistit Brace, iu përgjigj kryeparlamentari Gramoz Ruci i cili mori ‘në mbrojtje’ ministrin Ahmetaj. Ruci tha se interpelanca me ministrin e financave nuk eshte kryer për shkak të axhendës së tij jashtë vendit, duke iu referuar udhëtimit të Ahmetajt, një ditë më parë në Paris për eurobondin.
(BalkanWeb)