TIRANE

Deputeti i LSI-së, Endrit Braimllari nga protesta e banorëve të Unazës së Re, ka kërkuar që Prokuroria të  ndëpresë punimet për projektin e Unazës së  Madhe, ndërsa e cilësoi gjithë zonën, një skenë krimi.

Më tej, deputeti i LSI tha se është  e papranushme që në burg të ketë ende protestues, ndërsa kryeministri Edi Rama, ministri i Infrastrukturës dhe Energjisë, Damian Gjiknuri dhe kreu i ARRSH-së, Afrim Qendro janë ende të lirë.

Braimllari u shpreh se Rama është fajtori kryesor për varfërimin e shqiptarëve.

Braimllari

“E para do doja ti kërkoja Prokurorisë të bllokojë punimet në Unazën e Re, pasi sot jemi bërë të njohur nga media që ka filluar procesi i hetimit.

Dhe Prokuroria duhet të bllokojë punimet në mënyrë që këta banorë të qetësohen pikë së pari dhe e drejta të shkojë në vend. Sot këtu jo vetëm është një skenë krimi, por sot këtu është vërtetuar hajdutëria e Edi Ramës. Hajdutëria e Edi Ramës, e cila i kalon përmasat e shpronësimit të këtyre banorëve. 18 milion euro do të shkonin në kompani offshore për t’u pasqyruar në emër të Edi Ramë, Damian Gjiknurit, Afrim Qëndros. Dhe sot mbahen në burg 3 djem të cilët protestojnë dhe kanë protestuar për pronën e tyre dhe nuk shkojnë në burg Damian Gjiknuri, Afrim Qëndro dhe Edi Rama. Kjo është e turpshme.
ARSH ka kryer një vepër penale në këtë rrugë, sepse procesi i tenderimit ka filluar pa pasur leje. E dyta,. Procesi i tenderimit dhe fillimi i punës së projektit ka filluar pa u shpronësuar banorët. Nëse ARSH-ja nuk e di gjendjen e banorëve dhe nëse banorët nuk janë shpronësuar, pse atëherë ka filluar prishja e disa objekteve në këtë zonë? Kjo tregon dhe njëherë që çdo gjë kërkohet të bëhet fshehurazi, në kurriz të këtyre banorëve, në përfitim të Edi Ramës.
Edi Rama ka varfëruar Shqipërinë dhe shqiptarët dhe po i varfëron çdo ditë dhe më shumë. Sot shqiptarët janë gjithmonë e më të varfër dhe detyrohen të largohen nga Shqipëria për shkak të politikave të Edi Ramës. Sot të rinjtë dhe të rejat e këtij vendi protestojnë përpara kryeministrisë për shkak të Edi Ramës. Dhe unë i bëj thirrje të gjithë qytetarëve, jo vetëm te Tiranës por anë e mbanë vendit, t’i bashkohen studentëve, pa bindje politike, për flamurin kombëtar. Sepse protesta e tyre nuk është protestë me bindje politike por është protestë qytetare, është protestë kombëtare, është protestë për të tashmen dhe të ardhmen e vendit. Nëse ne të gjithë kemi plan dhe duam të jetojmë në Shqipëri, kjo qeveri duhet t’i shërbejë këtyre banorëve dhe studenteve. Duhet të ndërtojmë të ardhmen tonë në këtë vend dhe e ardhmja jonë ndërtohet duke i shërbyer pikësëpari sistemit arsimor. Edi Rama nuk e do arsimin, nuk i do të rinjtë dhe Edi Rama po e shkatërron gjithmonë e më shumë këtë vend. Ndaj të jemi të gjithë bashkë të mobilizuar sepse fundi i Edi Ramës do të jetë tipik fund diktatori”, u shpreh ai.

 (BalkanWeb)

Për t’u bërë pjesë e grupit "Balkanweb" mjafton të klikoni: Join Group dhe kërkesa do t’ju aprovohet menjëherë. Grupi Balkanweb