I mandatuari i PD për tryezën e përbashkët të Reformës Zgjedhore, Oerd Bylykbashi, debatoi me analistin Fatos Lubonja, në emisionin “Real Story”, në News24.

Bylykbashi këmbënguli se me Edi Ramën kryeministër nuk mund të ketë zgjedhje të lira e të ndershme, ndërsa theksoi se me tryezën, që ka bërë bashkë të gjitha palët politike, do iu ofrohet shqiptarëve Reformë Zgjedhore, zgjedhje të lira dhe zgjidhje e krizës së thellë politike. Por, Lubonja ndërhyri, duke i kërkuar të sqarojë se si do të arrihet kjo.

Pjesë nga debati:
Bylykbashi: Unë s’jam demagog e populist, jam realist. Nuk thashë shumë gjëra nga ato që tha Lubonja tani. Shtrembëruat një nga tezat e mia. Reforma Zgjedhore nuk do të bëhet asnjëherë bajonetë. Edhe kur zgjedhjet kanë qenë shumë të këqija, si ato të 2001, Reforma zgjedhore ka arritur konsensus. PD nuk ndalet në asnjë sekondë në kursin e saj, përfshi protestat. Kriza në Shqipëri është gjithnjë e më e rëndë. Kriza do vazhdojë, sa kohë Rama nuk lëviz. Në këtë situatë, duke qenë se kriza është kaq e rëndë, alternativa e zgjidhjes është me zgjedhje. Një vit ne kërkuam largimin e Ramës dhe zgjedhje të lira e të ndershme.

Lubonja: Unë dua një përgjigje, por s’po e marr. Unë po të fus në hulli.

Bylykbashi: Kemi Reformë Zgjedhore, zgjedhje të lira e të ndershme dhe zgjidhje.

Lubonja: Me Ramën kryeministër? Se ky është problemi.

Bylykbashi: Rama nuk mund të jetë kurrë garancia për zgjedhje të lira e të ndershme. Testimi i zgjedhjeve dhe i Reformës Zgjedhore bëhet vetëm me zgjedhje. Rama thotë që do rri deri më 2021, do përpiqem të vë gjyqtarët që kam kapur unë, dhe më pas testojmë dhe me kismet për shqiptarët Evropa do hapë fazën e dytë për negociatat më 2022.

Lubonja: Turqia i ka hapur negociatat qysh kur dhe ka shkuar keq e më keq. Ju e keni parasysh këtë përvojë? Ja u vonua hapja e negociatave, ç’i prishi punë Ramës?

(BalkanWeb)