Në pritje për të kuptuar se kur dhe si do të rifilloj sezoni, ekipet në Serie A kanë nisur të programojnë merkaton e ardhshme. Në shtëpinë zikaltër ka shumë lëvizje, mbi të gjitha në fazën ofensive. Në ditët kur flitet shumë mbi të ardhmen e Martinez dhe Mauro Icardi, del në skenë një emër i ri, një lojtar që mund të sjell revolucion në sulmin e Inter, bëhet fjalë për Edison Cavani.

Sipas “La Gazzetta dello Sport”, agjentët e sulmuesit uruguaian i kanë ofruar Interit shërbimet e tij. Marotta dhe Ausilio nuk e kanë shpërfillur si ide, përkundrazi janë shumë të interesuar duke parë dhe vështirësitë për të arritur tek Giroud, i cili sapo ka rinovuar kontratën me Chelsea. Me Alexis Sanchez i cili pritet të rikthehet tek Man.United, Inter është i detyruar të futet në garë për të gjetur një tjetër sulmues. Në të njëjtën kohë, agjentët e Cavanit kanë telefonuar edhe drejtuesit e PSG për të kuptuar nëse ekziston ndonjë mundësi për rinovimin e kontratës e cila i skadon më 30 qershor 2021.

Nëse PSG rinovon kontratën me Cavanin, kjo do të thotë se klubi francez nuk ka ndërmend të shfrytëzoj të drejtën për të blerë përfundimisht kartonin e Mauro Icardi, me një çmim të fiksuar për 70 milion euro. Juventus mbetet në pritje për të kuptuar se çfarë do të ndodh me sulmuesin argjentinas i cili mbetet një objektiv fiks i “Zonjës së Vjetër”.
(BalkanWeb)