Kryediplomati i Turqisë përsëriti qëndrimin e vendit se ai e sheh të ardhmen e tij me Bashkimin Evropian (BE), por që përpara se të realizohej anëtarësimi, duhet zgjidhur çështjet ekzistuese.

Duke folur në Forumin e katërt Botëror të TRT (TRT World Forum) në një panel të titulluar “Realitetet e reja dhe marrëdhëniet ndërshtetërore pas COVID-19”, ministri i Jashtëm turk Mevlüt Çavuşoğlu bëri komente mbi ndërveprimet diplomatike nën hijen e koronavirusit, si dhe multilateralizmin dhe politikën e jashtme të Turqisë në përgjithësi.

“Turqia është një aleate e fortë e NATO-s dhe e sheh të ardhmen e saj në Bashkimin Evropian”, tha Çavuşoğlu.
“Sapo të kapërcejmë konfuzionin aktual ekzistues kryesisht në anën evropiane, unë besoj se hapi historik i pranimit të Turqisë në BE mund të ndërmerret”, shtoi ai, raporton Anadolu Agency (AA).

Ai sugjeroi që zgjidhja e mosmarrëveshjeve të vazhdueshme midis Ankarasë dhe Brukselit do të kishte një “efekt transformues” në fqinjësinë më të gjerë të Turqisë gjithashtu.

Duke komentuar zhvillimet në Mesdheun Lindor, ku tensionet kanë qenë të larta që nga zbulimi i rezervave të hidrokarbureve, Çavuşoğlu tha se shqetësimi kryesor i vendit të tij ishte të mbrojë të drejtat e saj, së bashku me ato të Republikës Turke të Qipros Veriore (TRNC).

Sipas ministrit, Greqia dhe grekët qipriotë po përpiqen t’ia imponojnë Turqisë agjendën e tyre “të njëanshme dhe maksimaliste”, duke abuzuar me solidaritetin e BE-së për të promovuar “agjendën e tyre nacionaliste”.

– Operacioni “IRINI”
Midis temave që Çavuşoğlu i komentoi ishte aksioni ndaj një anijeje tregtare me flamur turk pa miratimin e Turqisë më 22 nëntor.

Në një shkelje të qartë të ligjit ndërkombëtar, operacioni “IRINI”, nisma e BE-së për të zbatuar embargon e armëve të OKB-së mbi Libinë, “u përdor si një mjet kundër Turqisë”, tha ai, duke vënë në dukje se fregata gjermane që ndaloi me forcë anijen e mallrave me flamurin e Turqisë nuk gjeti asnjë kontrabandë në bord, ndërsa anëtarët e ekuipazhit ishin keqtrajtuar dhe ngacmuar.

“Ne protestojmë fuqishëm ndaj këtij akti të paligjshëm. Rezolutat e Këshillit të Sigurimit të OKB-së mbi embargon libiane të armëve nuk e shkelin lirinë e lundrimit. Ne rezervojmë të drejtën tonë të përdorim çdo mjet të ligjshëm dhe legjitim të disponueshëm për t’u përgjigjur”, tha ai në lidhje me incidentin, i cili ndodhi jashtë ishujve të Peloponezit.

Ministri vazhdoi duke thënë se trajnimi dhe mbështetja këshilluese e Turqisë për qeverinë libiane të njohur nga OKB-ja jo vetëm që parandaloi një luftë civile, por gjithashtu hapi rrugën për procesin politik të udhëhequr nga OKB-ja.

Pavarësisht nga fakti që operacioni befasoi qeverinë turke, vendi është ende i gatshëm për dialog dhe bashkëpunim në Mesdheun Lindor, tha Çavuşoğlu, i cili bëri thirrje për një konferencë rajonale ku të gjithë shtetet bregdetare, përfshirë qipriotët turq, do të ishin të pranishëm.

– Konflikti Azerbajxhan-Armeni
Duke iu referuar konfliktit në rajonin e Malësisë së Karabakut midis Azerbajxhanit dhe Armenisë, ministri i Jashtëm turk tha se “pushtimi i paligjshëm i një të pestës së territorit të Azerbajxhanit që nga fillimi i viteve 1990 konsiderohej si një konflikt i ngrirë”.

Megjithatë, sipas Çavuşoğlu-t, nuk ekziston diçka të tillë si “konflikt i ngrirë”, pasi nuk ishte konflikti, por zgjidhja që ishte e ngrirë.

“Kur Armenia vazhdoi agresionin e saj përmes sulmeve të përsëritura, konflikti u kthye përsëri në dhunë”, tha ai.

Duke theksuar se Turqia ka mbështetur një zgjidhje të negociuar bazuar në ligjin ndërkombëtar dhe rezolutat e Këshillit të Sigurimit të OKB-së, ai theksoi se Ankaraja mirëpriti deklaratën e përbashkët të nënshkruar midis Azerbajxhanit, Armenisë dhe Rusisë, duke shtuar se Turqia gjithashtu do të ndërmarrë një rol për të ruajtur paqen dhe për të monitoruar armëpushimin me kërkesën e Bakut.

– Populizmi në rritje në Evropë
Çavuşoğlu argumentoi se pandemia e koronavirusit të ri përkeqësoi tendencat në rritje të intolerancës, racizmit dhe islamofobisë, duke shprehur keqardhje që “Evropa ishte pika qendrore e tendencave të tilla negative”, veçanërisht në perëndim të kontinentit.

Ministri shtoi se Turqia është e shqetësuar për diskursin në rritje populist, racist, anti-emigrant në Evropë, duke shtuar se gjuha e urrejtjes dhe botimet fyese kanë qenë në rritje kundër muslimanëve, siguria dhe mirëqenia e të cilëve janë nën kërcënim.
“Diskursi populist dhe racist do të shërbejë vetëm për të forcuar radikalët dhe terroristët”, tha ai.

Gjithashtu duke komentuar mbi “keqtrajtimin” e azilkërkuesve nga Greqia dhe Agjencia Evropiane e Kufirit dhe Rojes Bregdetare (Frontex), ministri i Jashtëm tha se politikat e kthimit mbrapa janë kundër ligjit ndërkombëtar, ndërsa Evropa mbetet e heshtur për këtë çështje.

Për t’u bërë pjesë e grupit "Balkanweb" mjafton të klikoni: Join Group dhe kërkesa do t’ju aprovohet menjëherë. Grupi Balkanweb
Etiketa: