2 fitore në 2 ndeshjet e fundit i kthyen më në fund buzëqeshjen Armando Cungut, më saktë i dhanë pak frymëmarrje për pjesën e mbetur të fazës së tretë, fundja diferenca me Partizanin kryesues tashmë është vetëm 6 pikë. Tekniku shkodran nuk kishte kohë të festonte trepikëshin kundër Luftëtari pasi nëse kthen kokën pas dhe sheh infermierinë, e sigurt është se nuk i dalin llogaritë.
Në vigjilje të transfertës kundër Skënderbeut i duhet të shpik nga e para repartin defensivë. Pas Cuculit dhe Rrumbullakut, Cungu humbet edhe shërbimet e Ylli Shametit. Kapiteni doli i dëmtuar nga sfida kundër gjirokastritëve, prezenca e tij kundër Skënderbeut është në pikëpyetje.
Si të mos mjaftojë mungesa e 3 mbrojtësve, pak kohë më parë Cungu humbi dhe shërbimet e brazilianit Kordero, i cili vijon stërvitjen i diferencuar.
Lajmi i mirë është se ofensiva po kalon një moment pozitiv, mbi të gjitha Valdet Rama. Ish mesfushori i Kombëtares u përshtat shumë shpejt me futbollin shqiptar dhe me Kukësin teksa në dy sfida e fundit ka shënuar dy gola.
(BalkanWeb)