Me temën “Lubonja kundër Kadaresë”, të enjten në mbrëmje në emisionin e gazetarit Ylli Rakipi, “Të Paekspozuarit”, publikohen për herë të parë dokumente ekskluzive që pritet të hedhin dritë mbi debatin e Fatos Lubonjës me shkrimtarin Ismail Kadare, në lidhje me gjyqin e të atit, shkrimtarit Todi Lubonja.
Fatos Lubonja njihet si një ndër kritikët më të fortë të Kadaresë në këto 25 vitet e fundit dhe në gjyqin e tij ka implikuar të atin dhe Kadarenë si frymëzues të leximeve të fshehta dhe mendimeve të gabuara. Por një dokument i fundit i botuar, një dëshmi e babait të Lubonjës i hedh poshtë këto ide.
Sakaq, Lubonja i është drejtuar Kadaresë me një letër, ku i kërkon që të hapë dosjen e tij gjatë regjimit komunist dhe sidomos gjyqin ndaj Todi Lubonjës dhe Fatos Lubonjës.
Në përgjigje të letrës së publicistit Henri Çili, Kadare shkruante se Lubonja vetë e kishte pranuar në gjyqin ndaj të atit, se Todi Lubonja ishte influencuar prej Kadaresë për t’u bërë armik i regjimit.
Mirëpo, Fatos Lubonja e ka hedhur poshtë këtë version. Ai ka thënë se Kadare ka transformuar gjithçka dhe kërkon të paraqesë një njeri tjetër nga ai çfarë ka qenë në ato vite.
(BalkanWeb)