TIRANË
Kryeministri Edi Rama ka mbajtur një fjalë përshëndetëse gjatë ceremonisë në kuadër të stërvitjes ushtarake “Defender Europe 2021”, e cila ka zbritur sot në sheshin “Nënë Tereza”, ku është organizuar një ditë e hapur.
Rama iu shprehu mirënjohjen të gjithë ushtarakëve të përfshirë në këtë stërvitje dhe të gjithë atyre nën uniformë.
Nuk mungoi një falënderim i veçantë dhe për ambasadoren e SHBA Yuri Kim. Rama tha se ambasadorja Yuri Kim me përkushtimin e saj mbresëlënës i ka dhënë një cilësi të re marrëdhënieve mes dy shteteve duke u përfshirë në vetë të parë në mbështetjen e kërkesave dhe të nevojave të vendit tonë qoftë në forcimin e kapaciteteve të mbrojtjes, qoftë të kapaciteteve tona të drejtësisë.
“Është një nder i veçantë dhe një privilegj për mua që sot në emër të qeverisë së Republikës së Shqipërisë t’iu shpreh mirënjohjen të gjithë ushtarakëve të përfshirë në këtë stërvitje kaq domethënëse për nga përmasat dhe për nga mesazhi i saj. Njëkohësisht dëshiroj që përveç dhe përtej mirënjohjes për të gjithë djemtë dhe vajzat, burrat e gratë nën uniformë që janë përfshirë në këtë stërvitje dhe që në të njëjtën kohë përbëjnë dhe garancinë dhe sigurinë e përditshme për shqiptarët dhe për Shqipërinë me përkushtimin dhe sakrificat e tyre t’iu shpreh mirënjohjen edhe familjeve të tyre. Familje që sakrifikojnë çdo ditë dhe që janë të parat që preken nga emocionet jo të vogla dhe jo të rralla të përfshirjes së pjesëtarëve të tyre në Forcat e Armatosura për të cilat jo çdo ditë është e qetë dhe jo çdo kohë është e sigurt. Po sot dua t’i falënderoj me mirënjohje të gjithë ushtarakët e përfshirë në këtë stërvitje kaq domethënëse nga SHBA-të dhe nga të gjitha vendet e tjera si dhe dua t’i bëj një falënderim të posaçëm përfaqësueses së qeverisë së SHBA-ve në Shqipëri, ambasadores Yuri Kim e cila me përkushtimin e saj mbresëlënës i ka dhënë një cilësi të re marrëdhënieve mes dy shteteve duke u përfshirë në vetë të parë në mbështetjen e kërkesave dhe të nevojave të vendit tonë qoftë në forcimin e kapaciteteve të mbrojtjes, qoftë të kapaciteteve tona të drejtësisë”, deklaroi kryeministri.
Rama theksoi se besimi që SHBA-të kanë treguar në vijim tek ky partneritet dhe tek kjo aleancë e madhe strategjike me Shqipërinë e vogël kulmon me këtë stërvitje ushtarake e cila jo rastësisht është stërvitja më e madhe me përfshirjen më domethënëse që ka ndodhur ndonjëherë në historinë e rajonit tonë.
“Së fundi dua të nënvizoj dhe faktin që në ndërkohë edhe vetë kjo shfaqje e bukur apo ekspozitë për t’iu dhënë mundësi qytetarëve që të vijnë dhe vizitojnë nga afër gjithë këtë arsenal nuk do ishte e tillë sot nëse nuk do kishte qenë mbështetja konkrete e qeverisë së SHBA-ve për rritjen e vazhdueshme të kapaciteteve të ushtrisë shqiptarë, sa për burimet njerëzore aq dhe në aspektin e modernizimit të Forcave tona të Armatosura me mjete e logjistikë të fjalës së fundit. Unë kam shumë besim dhe bazuar në bisedat me gjeneralët që na nderuan me praninë e tyre në hapjen e kësaj stërvitjeje por dhe në bashkëbisedimin e vazhdueshëm me ambasadoren e SHBA-ve se ne do të hedhim hapa të tjerë kuptimplotë në rritjen e cilësisë së burimeve njerëzore të Forcave tona të Armatosura.
Jam shumë falënderues dhe mirënjohës për të gjithë sa janë përfshirë në këtë proces të jashtëzakonshëm aspak të lehtë të Forcave tona të Armatosura dhe me bindjen e plotë që kjo stërvitje nuk mbaron në aspektin e influencës së saj në FA–të tona me mbarimin e afatit të përcaktuar, por do vazhdojë të influencojë moralisht të gjithë ushtarakët tanë, uroj që miqësia e madhe mes Shqipërisë dhe SHBA-ve të jetë e përjetshme dhe siç tha ambasadorja të vazhdojmë të jemi krahë për krah sot, nesër e përgjithmonë”, deklaroi Rama.
