TIRANË
Presidenti i Republikës, Ilir Meta, ka reaguar pas deklaratës së Departamentit Amerikan të Shtetit. Kreu i shtetit, Ilir Meta ka përshëndetur deklaratën e sotme të DASH, ku theksoi se po ndjekë me vëmendje zhvillimet e fundit në vendin tonë. Presidenti i vendit ka ripërsëritur faktin se do bashkëpunojë ngushtë me DASH për zbatimin e Reformës në Drejtësi sipas Kushtetutës së miratuar në bashkëpunim me SHBA dhe Komisionin e Venecias.
Më tej, Ilir Meta thotë se i qëndron besnikërisht të gjitha qëndrimeve të tij, të cilat i ka shprehur zyrtarisht për përfaqësuesit e lartë amerikanë gjatë 5 viteve të fundit, përfshirë edhe bisedën e fundit me Zv.Ndihmës Sekretarin e Shtetit të SHBA, Matthew Palmer.
“Presidenti Meta i qëndron besnikërisht të gjitha qëndrimeve të tij të qarta dhe transparente, të shprehura zyrtarisht për përfaqësuesit e lartë amerikanë gjatë 5 viteve të fundit, që i përsëriti dhe në bisedën zyrtare telefonike që zhvilloi mbrëmjen e 20 nëntorit me Zv.Ndihmës Sekretarin e Shtetit të SHBA, z.Mattheë Palmer”- thuhet në reagimin e Metës.
Reagimi i Presidencës:
Presidenti i Republikës Sh.T.Z Ilir Meta vlerëson maksimalisht deklaratën e sotme të Departamentit të Shtetit të SHBA.Presidenti Meta konfirmon vendosmërinë e Tij për të bashkëpunuar ngushtë me DASH dhe SHBA për zbatimin e Reformës në Drejtësi sipas Kushtetutës së miratuar në bashkëpunim me SHBA dhe Komisionin e Venecias.
Presidenti Meta i qëndron besnikërisht të gjitha qëndrimeve të tij të qarta dhe transparente, të shprehura zyrtarisht për përfaqësuesit e lartë amerikanë gjatë 5 viteve të fundit, që i përsëriti dhe në bisedën zyrtare telefonike që zhvilloi mbrëmjen e 20 nëntorit me Zv.Ndihmës Sekretarin e Shtetit të SHBA, z.Matthew Palmer. Aleanca strategjike midis Shqipërisë dhe SHBA dhe miqësia e shkëlqyer midis dy vendeve dhe popujve tanë është e palëkundur.