TIRANE– Nënkryetari i Grupit Parlamentar të Partisë Demokratike, Enkelejd Alibeaj, ka denoncuar një ngjarje të ndodhur në Memaliaj. Përmes një reagimi për mediat, Alibeaj thotë se drejtori i Policisë, Lorenc Paganika, ka aksidentuar një kalimtar në Memaliaj dhe më pas është larguar nga vendi i ngjarjes pa i dhënë ndihmën e parë.

Më tej deputeti demokrat thotë se po tentohet që të manipulohet ngjarja. Sipas Alibeajt, Paganika e ka dërguar menjëherë në servis makinën e dëmtuar.

REAGIMI I PLOTE
Një ngjarje e rëndë ka ndodhur në Gjirokastër. Drejtori i Policisë, Lorenc Paganika ka aksidentuar një kalimtar në Memaliaj dhe është larguar nga vendi i ngjarjes duke mos i dhënë as ndihmën e nevojshme qytetarit, por tashmë po tenton të manipulojë ngjarjen. Fatmirësisht qytetari i aksidentuar është jashtë rrezikut për jetën.

Makina e tij pësoi dëmtime nga aksidenti por drejtori nxitoi që ta rregullojë, dhe ka lejuar ekspertimin nga grupi hetimor vetëm pasi makina ka dalë nga servisi, duke tentuar të mbyllë çështjen.

Kjo ngjarje, e gjitha e filmuar, tregon sjelljen e paprecedentë të kreut të policisë së një qarku. Sjellja e këtij kryepolici vërteton gjendjen e Policisë së Shtetit, ku shefat e saj janë mbi ligjin dhe nuk ka asgjë të përbashkët me qindra oficerë të tjerë të ndershëm të Policisë së Shtetit.

Kjo është e vërteta. Policia ka kapitulluar përballë krimit të organizuar, trafikut të drogës dhe nuk garanton dot sigurinë e qytetarëve. Ky është realiteti i qeverisë së Edi Ramës, me krimin që zotëron vendin, me drogën që blen zgjedhjet, me kryepolicë që nuk duan t’ia dinë për ligjin.​

(BalkanWeb)