Nga: KLODIANA LALA*

TIRANE – Deputeti i Partisë Socialiste, Armando Prenga, i cili prej më shumë se një muaji ndodhet i izoluar në qeli, duket se po tenton pajtimin me familjen Cali, me të cilën është në konflikt për shfrytëzimin e Lagunës së Patokut.

Pak ditë më parë, ai ka dërguar një të njohurin e tij për të biseduar me Calët dhe për ta zgjidhur mosmarrëveshjen mes tyre me pajtim. Një fakt i tillë pranohet edhe nga Gjon Cali, një prej pjesëtarëve të familjes që për vite shfrytëzoi lagunën, e cila shërbeu si mollë sherri, duke sjellë për pasojë shtatë të plagosur dhe burgosjen e deputetit.

Gjatë një bisede telefonike me “GSH”, Gjon Cali ka pohuar se një i njohur i familjes së tyre ka biseduar me ta për çështjen e pajtimit me Armando Prengën, por deri më tani nuk e kanë konsideruar si mundësi pajtimi, pasi asnjë pjesëtar i familjes Prenga nuk ka trokitur në derën e tyre.

“Është e vërtetë që një mik i largët na ka bërë një bisedë për pajtim me familjen Prenga. Por, asnjë pjesëtar i kësaj familjeje nuk ka ardhur në shtëpinë tonë për të folur për pajtim”, tha Gjon Cali. Ai theksoi se tentativa e parë është bërë nga personi në fjalë, duke u kërkuar pikërisht Calëve të kërkojnë falje, ata në drejtim të deputetit, për shkak se vëllai i Armando Prengës ka mbetur gjithashtu i plagosur rëndë. “Ne na vranë, na masakruan dhe s’kemi pse t’i kërkojmë kujt falje”, thotë më tej Gjoni.

Por, pyetjes sesi do të veprohet nga fisi Cali nëse familja e deputetit kërkon pajtim, Gjon Cali i përgjigjet: “Do ta bisedojmë gjatë dhe do marrim një vendim, nëse familja në fjalë kërkon pajtimin, sipas zakoneve që kemi ne si krahinë. Ne nuk duam të jemi në konflikt me askënd. Nuk duam të lëmë problem të hapura për fëmijët tanë”, dëshmon më tej ai. Tentativa për pajtim, duket se është një lëvizje e menduar mjaft mirë nga Armando Prenga. Fakti që akuza e plagosjes së rëndë në ngarkim të tij ka rënë, pasi mjekësia ligjore ka dalë në konkluzionin se plagosja me armë e Tom Calit futet në kategorinë e plagosjeve të lehta, në fakt e lehtëson pozitën e Calit përballë ligjit.

Në kushtet kur personi i dëmtuar tërheq kallëzimin, vepra penale e plagosjes së lehtë pushohet për shkak se ligji parashikon që për ndjekjen e kësaj vepre penale duhet me patjetër kërkesa e të dëmtuarit. Pra, nëse Calët pranojnë ta falin Prengën, akuza e plagosjes së lehtë ndaj tij bie dhe për këtë pjesë pushohet çështja.

Ndërsa, sa i përket armëmbajtjes pa leje, deri në këto momente nuk është gjetur arma e krimit dhe do të jetë shumë e vështirë për prokurorinë ta vërtetojë se kush nga pjesëmarrësit në ngjarje ka qëlluar. Kjo është për faktin se nga pamjet filmike të kamerave të sigurisë së komisariatit nuk rezulton të dallohet deputeti.
(er.nu/Gazeta Shqiptare/BalkanWeb)

Për t’u bërë pjesë e grupit "Balkanweb" mjafton të klikoni: Join Group dhe kërkesa do t’ju aprovohet menjëherë. Grupi Balkanweb
Etiketa: