Deputetja e Partisë Demokratike, Ina Zhupa ka nxjerrë emrat e katër funksionarëve të lartë të Bashkisë dhe administratës në Sarandës që sipas saj po intimidojnë votuesit.

Në një deklaratë për mediat, Zhupa tha se nënkryetarja e Bashkisë dhe tre drejtorë qëndrojnë pranë qendrave të votimit për të kërcënuar votuesit.

Deklarata

Drejtues të institucioneve publike të Sarandës!

Nënkryetare e Bashkisë Sarandë Lindita Qëndro

Drejtor Mariel Murati
Drejtor Arjan Kalcuni
Drejtor Alket Qëndro

Hiqni dorë urgjentisht nga intimidimi i qytetarëve jashtë qendrave të votimi. Lejini të lirë banorët e Sarandës e Ksamilit të votojnë.
Bashkëqytetarët tanë janë te zgjuar mjaftueshëm e të vetëdijshëm se cila është alternativa që i përfaqëson ata.

Boll jeni pasuruar në kurriz të tyre, ata nuk janë si ju, pronarë hotelesh e ndërtues pallatesh, zaptues tokash e pronash publike.

Ju njohin shumë mirë, e dinë se çfarë përfaqësoni e çfarë kërkoni të merrni nga Bashkia.
Ata janë qytetarë të lirë dhe si të tillë e duan të çliruar atë institucion nga kthetrat e mafies së pronave që kërkon ta zaptojë.

Ju garantojmë se ju njohim emër për emër ju intimidues, ua dimë bëmat dhe mendësitë.
Boll më! Blendi Klosi me bandat e tij do të largohet nesër, ndërsa ju do të jetoni sërish me bashkëqytetarët tuaj.

Mos u bëni bashkëfajtor në krim, hiqni dorë sa nuk është vonë!