Gara për titullin kampion është ende e gjatë, por Inter dhe Milan do të japin një tjetër shijim të sfidës së madhe që deri tani po luhet në distancë. Derbi i Milanos kthehet të martën në mbrëmje për çerekfinalen e parë të Kupës së Italisë, ndërsa është edhe një test force mes dy kryesuesëve të Serie A.

Për Inter dhe Antonio Conte ka edhe shijen e revanshit, pas humbjes në përballjen e parë sezonale në kampionat. Po ashtu, zikaltërit kërkojnë të qëndrojnë në “valle” për trofeun e dytë për nga rëndësia në futbollin italian. Megjithëse e ka luksin për rotacion, Conte nuk do të kursejë titullarët e tij. Një raund pushim mund t’i jepet Lautaro Martinez, duke aktivizuar Alexis Sanchez në krah të Lukaku nga minuta e parë në sulm.

Nuk janë më të pakta pretendimet e Milan. Kuqezinjtë kërkojnë të kthehen te fitorja, pas goditjes së rëndë që morën nga Atalanta të shtunën. Pioli as që e ka në mend rotacionin, ndërsa mund të vijë me një surprizë në derbi, duke hedhur në fushë nga minuta e parë Mario Mandzukic. Kroati debutoi në kampionat me ngjyrat kuqezi, ndërsa mund të marrë fanellën e titullarit bashkë me Zlatan Ibrahimovic.
(balkanweb)