MIRDITË

Detaje të reja kanë dalë në dritë nga aksidenti i rëndë që ndodhi pasditen e sotme në Mirditë. Burime për “BalkanWeb”, bëjnë me dije, se nga përplasja mes autobusit dhe makinës “Land Rover”, viktimë ka mbetur 57-vjeçari nga Kosova, Hysen Selitaj.

I ndjeri ndodhej në ato momente në makinë së bashku me të birin, i cili ka mbetur i plagosur nga përplasja e fortë.

Raportohet se ai është dërguar për mjekim në Spitalin e Rrëshenit. Nga krahu tjetër, për fat të mirë, drejtuesi i autobusit dhe pasagjerët nuk pësuar lëndime. “BalkanWeb” ka mundur të sigurojë dhe pamje nga vendi ngjarjes.

Makina “Land Rover” shihet thuajse tërësish e shkatërruar, ndërsa dëme të shumta ka pësuar edhe autobusi. Drejtuesi i kësaj të fundit është shoqëruar në komisariat, ku pritet të japë versionin e tij për ngjarjen.

Njoftimi i Policisë:

Rreth orës 17:22, në aksin rrugor Rubik-Rreshen ,mjeti autobus është përplasur me mjetin tip “Land Rover” me targa italiane, ku si pasojë ka gjetur vdekjen drejtuesi i mjetit ende i paidentifikuar.

Drejtuesi i mjetit autobus po shoqërohet në Komisariatin e Policisë Mirditë, për veprime të mëtejshme.

Grupi hetimor ndodhet në vendngjarje dhe po punon për sqarimin e plotë të shkakut dhe rrethanave të ngjarjes

(BalkanWeb)