Gjykata e Vlorës ka vendosur të lërë në burg shtetasin Bardhosh Mino alias Lytaj, “të fortin” e akuzuar për disa vepra të rënda penale. Mino u arrestua dy ditë më parë nga Policia e Vlorës, ndërsa rezulton i dënuar me burgim të përjetshëm në Greqi për vrasjen e dy turistëve anglezë.
Ai akuzohet gjithashtu edhe trafik të lëndëve narkotike, si dhe për arratisje nga burgu, gjatë kohës që vuante dënimin për vrasjen e turistëve. Seanca e sotme në Gjykatën e Vlorës është zhvilluar me dyer të mbyllura, por gazetari Enrik Mehmeti ka siguruar për “BalkanWeb” një pjesë të dëshmisë së tij dhënë para togave të zeza.
Kështu, gazetari Mehmeti ka mësuar se Mino është shprehur në gjyq se “kam kryer burg në Greqi. Nuk e dija që isha në kërkim. Jam martuar, madje edhe me fëmijë”.
Mino ishte shpallur në kërkim nga autoritetet greke, ndërsa ka një të shkuar shumë të errët.
Ai akuzohej në shtetin fqinj për vjedhje të kryer në bashkëpunim, vjedhje me pasojë vdekjen e më shumë se një personi, grabitje me armë kryer në bashkëpunim, dhe vrasjen e dy turistëve anglezë në Patra të Greqisë, ngjarje e ndodhur në vitin 1998.
Mino grabiti, dhunoi dhe vrau dy turistë anglezë në afërsi të Patrës dhe për këtë ngjarje Gjykata e Shkallës së Parë në Patra e dënoi atë me burgim të përjetshëm.
Mbi Minon rendojnë edhe akuza e trafikut të lëndëve narkotike, prodhim dhe shitje e lëndëve narkotike për të cilën Gjykata e Kretës e ka dënuar me gjashtë vite burg.
Mino është dënuar nga Gjykata e Korfuzit me pesë muaj burg dhe për vjedhje të energjisë elektrike. Vendim i gjykatës së Shkallës së Parë në Patra të Greqisë pritet të konvertohet në burgim të përjetshëm në Shqipëri.
(BalkanWeb)
