Dy të rinjtë, Blerim dhe Klisman Preçi, i kanë shpëtuar mrekullisht mbrëmjen e djeshme një atentati me breshëri plumbash që u zbraz në mjetin që po udhëtonin.
Ngjarja ndodhi mbrëmë rreth orës 20:00 në dalje të qytetit të Lezhës, kur autorët që ishin në një makinë në lëvizje, që sipas dëshmive të siguruara nga gazetari Elidon Ndreka ishte tip Audi ngjyrë e zezë, kanë qëlluar me automatik mbi makinën që drejtohej nga 28-vjeçari Blerim Preçi.
Autorët janë larguar me shpejtësi nga vendngjarja, ndërsa mjeti tip “ML” i të riut, pas të shtënave ka dalë nga rruga.
Gazetari Igli Çelmeta, raportoi për BalkanWeb, se autorët i janë afruar makinë se të riut nga Miloti, Blerim Preçit, duke dalë paralel dhe kanë hapur zjarr ndaj tij. Më pas shoferi i “ML” ka ulur shpejtësinë dhe për t’i shpëtuar plumbave, është hedhur nga mjeti që ende ishte në lëvizje.
Për fat të mirë, të dy të rinjtë që ndodheshin në këtë mjet kanë shpëtuar pa lëndime.
Siç shihet në këto pamjet të siguruara nga News24 dhe BalkanWeb pak pas ngjarjes, dy të rinjtë kanë dalë nga mjeti në gjendje shoku.
Menjëherë pas atentatit, ka qenë Blerimi i cili ka telefonuar policinë dhe ka njoftuar se mbi mjetin e tij është qëlluar me armë.
Pas mbërritjes në vendngjarje, policia ka bllokuar autostradën, duke devijuar trafikun në rrugë dytësore, si dhe janë ngritur postblloqe në hyrje dhe në dalje të qytetit të Lezhës me qëllim krehjen e zonës dhe kapjen e autorëve.
Në afërsi të vendngjarjes mësohet se ndodhet një lokal, por kamerat e tij nuk shohin nga rruga, duke mos i dhënë dot ndihmë policisë për të zbardhur ngjarjen më shpejt.
DISA TE SHOQERUAR
Policia e Lezhës është ngritur në këmbë ndërsa është vënë pas autorëve të atentatit të mbrëmshëm ndaj një makine luksoze ku udhëtonin dy të rinj.
Gazetari Elidon Ndreka raporton për BalkanWeb se policia ka ushtruar kontrolle gjatë natës për të kapur atentatorët që sulmuan me armë makinën e 28-vjeçarit Blerim Preçi.
Po ashtu mësohet se ka pasur disa persona që janë shoqëruar për ngjarjen. Deri më tani nuk dihen motivet se për çfarë mund të ketë ndodhur ngjarja, ndërsa policia po heton.
