Deputeti i zgjedhur i Partisë Demokratike, Agron Shehaj, ka reaguar për zjarret që përfshinë mbrëmjen e djeshmëve godinën e Sarajeve të Toptanëve në Tiranë.
Me anë të një statusi në rrjete sociale, Shehaj shkruan se Sarajet, janë e vetmja dhe më e vjetra e mbijetuar në Tiranë, e këtë, e cilëson si humbje të madhe për trashëgiminë kulturore shqiptare.
Shehaj pretendon se godina është djegur si pjesë e një plani për të ndërtuar në atë vend kulla.
Postimi i Agron Shehaj:
Djegia dhe shkatërrimi i Sarajeve të Toptanëve, e vetmja dhe më e vjetra e mbijetuar në Tiranë, është një humbje e madhe për trashëgiminë kulturore shqiptare.
Pas shkatërrimit të Teatrit Kombëtar, përflitej prishja e Sarajeve si pjesë e planit të ndërtimit të kullave në atë vend. Ato dyshime u bënë realitet.
Zjarrvënia është bërë me leje të kryebashkiakut të Tiranës Erjon Veliaj, i cili ka gati edhe lejen e ndërtimit.
Kalojnë vitet, ndryshojnë kryebashkiakët por fatkeqësisht nuk ndryshon keqqeverisja.
Erjon Veliaj, nëpërmjet korrupsionit, ka vendosur postin e kryebashkiakut në shërbim të oligarkëve dhe pastrimit të parave.
(BalkanWeb)