Pas reagimeve të shumta të ardhura nga ndërkombëtarët por edhe nga politikanë të Kosovës, ka ardhur edhe reagimi i Presidentes Vjosa Osmani në lidhje me situatën e tensionuar sot në veri.
Osmani u shpreh se sovraniteti dhe integriteti territorial i Republikës së Kosovës është i pacenueshëm, i patjetërsueshëm dhe i pandashëm ndaj mbrohet me çdo mjet të përcaktuar në Kushtetutë.

Në reagimin e saj në rrjetet sociale, kryetarja e shtetit të Kosovës shton se veprimet e Policisë së Kosovës ndaj strukturave ilegale e bandave kriminale të presidentit serb Aleksandër Vuçiç janë legjitime.

“Sovraniteti dhe integriteti territorial i Republikës së Kosovës është i pacenueshëm, i patjetërsueshëm dhe i pandashëm, ndaj mbrohet me të gjitha mjetet e përcaktuara me Kushtetutë dhe me ligj. (Neni 2 i Kushtetutës)
Veprimet e Policisë së Kosovës ndaj strukturave ilegale e bandave kriminale të Vuçiqit janë legjitime, në realizim të detyrave të tyre kushtetuese dhe në mbrojtje të të gjithë qytetarëve, pa dallim.
Qëndrueshmëria, jetëgjatësia dhe suksesi i këtyre veprimeve varen njëkohësisht edhe nga koordinimi me aleatët që ishin dhe mbeten garantues të sovranitetit dhe pavarësisë sonë.
Bashkë, jemi gjithnjë më të fortë!”, shkruan Osmani.

(BalkanWeb)