SHBA- “Polemika”, deklarata të shumta, pastaj anullimi dhe në fund një tjetër konfirmim: Takimi me liderin e Koresë së Veriut do të mbahet më 12 Qershor.

Presidenti i SHBA-ve, Donald Trump e ka deklaruar vetë një gjë të tillë, duke shtuar se me udhëheqësin koreano-verior do të takohet në datën e caktuar, më 12 qershor, në Singapor. Këto komente presidenti amerikan i bëri pasi priti në Shtëpinë e Bardhë zyrtarin e lartë të Koresë së Veriut, Kim Yong Chol, siç raporton BBC. Ai është zyrtari i parë i lartë i vendit të mbyllur, që vjen për vizitë zyrtare në Shtetet e Bashkuara në 18 vitet e fundit.

Presidenti Trump tha se gjatë takimit dy-orësh me krahun e djathtë të udhëheqësit koreanoverior, kishin biseduar për një sërë çështjesh: që t’i jepej fund luftës rreth 70-vjeçare mes dy Koreve, si dhe për sanksionet ndaj Koresë së Veriut, për të cilat ai tha se do të vazhdojnë të mbeten në fuqi.

Ai tha se në këtë proces një rol të rëndësishëm do të kenë Koreja e Jugut, Japonia dhe Kina, fqinjët e fuqishëm të Koresë së Veriut. Presidenti Trump tha se takimi i një presidenti amerikan me udhëheqësin koreanoverior duhej të kishte ndodhur shumë vite më parë, të cilin ai e quajti një takim të rëndësishëm për t’i dhënë fund luftës koreane.

I pyetur nga gazetarët nëse kishte hapur çështjen e të drejtave të njeriut me përfaqësuesin e lartë të vendit komunist, Trump tha se kjo çështje nuk ishte diskutuar në takimin e së premtes në Shtëpinë e Bardhë. Por ai tha se udhëheqësit koreanoveriorë janë të interesuar që vendi i tyre të zhvillohet dhe në këtë proces ai tha se fqinjët e tyre do të kenë një rol të rëndësishëm.

Kim Yong Chol një ditë më parë i dorëzoi Presidentit Trump një letër të udhëheqësit koreanoverior Kim Jong Un, por presidenti nuk komentoi përmbajtjen e saj. I dërguari i Kim zhvilloi bisedime edhe me Sekretarin amerikan të Shtetit Mike Pompeo.
(m.a/BalkanWeb)