TIRANE- Kuvendi zgjodhi sot katër nga pesë anëtarët e Këshillit Mbikëqyrës të Reformës në Drejtësi. Komisioni i Ligjeve i përcolli Kuvendit një listë me nëntë kandidatë, por vetëm Artan Spahiu, Irna Milo, Lindita Rusmajli, Sajmir Vishaj morën votat e nevojshme nga deputetët për t’u zgjedhur në strukturën e re që do monitorojë zbatimin e “Drejtësisë”.
Pesë kandidatët e tjerë Andi Murataj, Saimir Shehri, Gëzim Allaraj, Suzana Pasha dhe Ilir Kadiu, ishin më pak të votuarit nga ligjvënësit e mazhorancës.
Ndërkohë, Kuvendi nuk ka arritur të kompletojë trupën e kësaj strukture me pesë anëtarë dhe si rrjedhojë, gara duhet të hapet edhe një herë nga e para për një vend.
Anëtarët e Këshillit Mbikëqyrës të zbatimit të Reformës në Drejtësi u zgjodhën vetëm me votat e mazhorancës, pasi opozita bojkotoi punimet e Kuvendit dhe zhvilloi një mbledhje paralele në Vlorë.
(BalkanWeb)