DELVINE
Një ngjarje e rëndë ka ndodhur në Delvinë, ku një automjet ka marrë flakë në ecje dhe si rrjedhojë, drejtuesi i makinës ka ndërruar jetë.
Ngjarja ka ndodhur pranë fshatit Shijan. Automjeti është shkrumbuar plotësisht. Ende nuk dihen shkaqet e djegies së makinës. Policia dhe zjarrfikëset janë në vendngjarje.
Forcat policore janë duke punuar për të zbardhur ngjarjen.
Njoftimi i policisë:
Sarandë
Informacion paraprak
Rreth orës 20:40, në aksin rrugor pranë vendit të quajtur “Karahaxh”, automjeti tip “Renault Megane” që drejtohej nga shtetasi A.C, ka dalë nga rruga dhe ka marrë flakë.
Si pasojë e flakëve të shpejta është djegur rëndë dhe ka ndërruar jetë brenda në mjet drejtuesi, shtetasi A.C me banim në Fier.
Ndërsa bashkëjetuesja e tij shtetasja M.M, ndodhet në Spitalin e Sarandës, jashtë rrezikut për jetën.
Grupi hetimor ndodhet në vendngjarje dhe po punon për zbardhjen e rrethanave të ngjarjes.
(d.xh/Balkanweb)