NGA XHENSILA KODRA
TIRANE- Efektivët e Policisë së Shtetit për herë të parë nuk do të marrin shpërblime për festat e fundvitit. Ky fakt bëhet me dije nga burime zyrtare të policisë. Po ashtu, mësohet se asnjë nga administratat publike nuk kanë marrë shpërblim në këtë fundvit. Sikundër ka ndodhur vitet e shkuara, ku uniformat blu kishin mungesa të pagave, apo në pagesat e orëve suplementare, apo të orëve shtesë dhe në festat e fundvitit kishin shpërblim, për këtë vit me ta ka ndodhur e kundërta.
Burimet e lartpërmendura theksuan se deri në fund të ditës së sotme, do të përfundojnë pagesat për çdo punonjës së Policisë së Shtetit, të cilët kishin ende para pa marrë për sa u përket orëve shtesë, për orët suplementare, orët e natës, dietat, apo edhe për orët që kanë qenë në stadium gjatë ndeshjeve të futbollit.
“Deri në fund të ditës së nesërme (sotme) do të jenë likuiduar të gjithë efektivët e Policisë së Shtetit dhe shumat e parave që ata kishin pa marrë do të kalojnë në llogaritë e tyre bankare”, thanë burimet për “Gazeta Shqiptare”.
Ndërkaq, po sipas këtyre burimeve, mësohet se shpërblim kanë marrë vetëm ata punonjës policie të cilët janë certifikuar me një “Certifikatë për Shërbime të Dalluara”. Në të gjithë vendin, mësohet se si shpërblim do të shpërndahen rreth 200 certifikata për punonjësit e policisë, ku vetëm në Tiranë janë shpërndarë 22 prej tyre.
Pak ditë më parë, ishte kreu i Policisë së Shtetit Haki Çako i cili me rastin e festave të fundvitit organizoi një kokteil me punonjës të policisë dhe shpërndau 20 “Certifikata për Shërbime të Dalluara” dhe 2 “Certifikata të Karrierës”.
Këto dy të fundit iu dhanë punonjësve Zef Laska dhe Dashnor Xhixho. Ndërsa, në mesin e 20 punonjësve që morën si shpërblim “Certifikata për Shërbime të Dalluara” ishin Drejtori i Përgjithshëm për Rendin dhe Sigurinë në Policinë e Shtetit, Altin Qato, si dhe Drejtori i Policisë Vendore Tiranë, Ervin Hodaj.
MËSUESIT, PA SHPËRBLIM EDHE PËR KËTË FUNDVIT. SINDIKATA: MË 7 JANAR VENDOSIM PËR GREVËN
Mijëra arsimtarë as këtë fundvit nuk do të marrin shpërblimin prej 10 mijë lekësh. Pavarësisht se ata zhvilluan takim me ministrin e Arsimit Lindita Nikolla, si dhe përfaqësues të ministrisë së financave shpërblimi i fundvitit për 35 mijë arsimtarë nuk u miratua nga qeveria.
Për të kënaqur mësuesit e sistemit arsimor paraunversitar qeveria duhet të akordonte nga buxheti 350 milionë lekë për shpërblimin e tyre.
Ditën e djeshme Aleanca Sindikale, zhvilloi në takim në lidhje me heshtjen e MAS dhe të qeverisë për shpërblimin e fundvitit, që sipas tyre u takon në bazë të kontratës Kolektive dhe Kodit të Punës.
“Aleanca Sindikale e konsideron këtë qëndrim të qeverisë si shkelje të vazhdueshme të një të drejte sindikale të fituar dhe, për këtë arsye, do të vazhdojë të kërkojë respektimin e kësaj të drejte, duke përdorur të gjitha mjetet sindikale dhe ligjore. Për këtë në datën 7 janar 2017 Aleanca Sindikale do të mbledhë Asamblenë e saj për përcaktuar hapat dhe veprimet sindikale e ligjore që do të ndërmerren në vijim”-u njoftua sindikalistët.
(Gazeta Shqiptare)
