I ftuar në emisionin “Alert” në News24 nga Granit Sokolaj, prof.dr.Abdyl Sinani, ekspert dhe Dekan i Fakultetit të Bioteknologjisë Ushqimore ka folur për rëndësinë e proteinave në bukë sipas normave të përcaktuara dhe se si ndikon në vlerën ushqyese të konsumatorit.

“Proteinat janë kryesore në bukë, sidomos në drithëra, nga 11.5-12.5%. Ne standardin e kemi 12% që të marrim grurë të cilësisë së lartë. Janë 4 grupe kryesore të proteinave, ku gluteni është kryesor për bukën. Gjatë fermentimit, gazi karbonik që prodhohet mbahet fortë nga ky gluten, i cili duhet të jetë i cilësisë së mirë. Në teknologji është e domosdoshme analiza e lëndës së parë, ku më e rëndësishmja është gruri. Nëse më përpara e blenim nga Serbia, jo vetëm kishte cilësi të ulët, por dhe të dobët të proteinave. 60% të ushqimit janë nga karbohidratet, në këtë fazë futet proteina. Duhet të ketë edhe aminoacidet, që janë normë e caktuar dhe është detyrë shtetërore për plotësimin e proteinës në cilësi, shtetet e tjera e kanë bërë. Proteinat janë të rëndësishme për muskulaturën, për procese hormonale, ndërsa karbohidratet japin energjinë. Detyra e teknologut është të bëjë përzierjen, edhe aditivët ushqimorë ndihmojnë për të balancuar këto difekte. Por duhet detyrimisht të zbatojmë standardet. Kujtojmë se para 2-3 vjetesh përdornim aditivë nga Serbia që e bënin bukën e bukur, por kanceroze.
Buka që ka më pak proteina, nuk fryhet, kemi plasaritje, pa cilësi. Duhet kontroll shumë i fortë në laborator, kërkon një ndjekje me shumë përgjegjësi nga lënda e parë deri tek prodhimi”, deklaroi prof.dr.Abdyl Sinani.