55-vjeçari Bujar Tafa, banues në Bërxullë ka rënë në prangat e policisë në Tiranë pasi iu gjet 1 kg e 34 gramë kokainë në makinë.

Uniformat blu bëjnë me dije se 55-vjeçari shpërndante drogë në zona të ndryshme në kryeqytet.

Ndërkohë ai u kap në rrugën “Jordan Misja”, ku pas kontrollit të policisë në automjetin që ai drejtonte, u gjet edhe lënda narkotike kokainë.

Informacioni i plotë: Finalizohet me sukses operacioni policor i koduar “Disponimi 2″, për goditjen e veprimtarisë kriminale në fushën e narkotikëve.

Operacioni i zhvilluar nga Sektori për Hetimin e Narkotikëve dhe Trafiqeve të Paligjshme në DVP Tiranë.

Vihet në pranga 1 shtetas.

Sekuestrohen 1 kg e 34 gramë lëndë e dyshuar narkotike kokainë, një automjet dhe një aparat celular.

Specialistët e Sektorit të Hetimit të Narkotikëve dhe Trafiqeve të Paligjshme, në vijim të punës për goditjen e aktivitetit kriminal në fushën e prodhimit dhe shpërndarjes së lëndëve narkotike, pas një pune të mirëfilltë hetimore, bazuar dhe në të dhënat e grumbulluara në rrugë operative, se një shtetas posedonte dhe shpërndante lëndë narkotike kokainë në zona të ndryshme të qytetit të Tiranës, organizuan dhe finalizuan me sukses operacionin policor të koduar ”Disponimi 2”, në kuadër të të cilit u bë kapja dhe arrestimi në flagrancë i shtetasit:

– B.T 55 vjeç, banues në Bërxullë.

Në rrugën “Jordan Misja”, shërbimet e Policisë, kanë lokalizuar dhe arrestuar në flagrancë shtetasin B. T., 55 vjeç, të cilit gjatë kontrollit të automjetit iu gjet dhe sekuestrua në cilësinë e provës materiale 1 kg e 34 gramë lëndë e dyshuar narkotike kokainë.

Vijon puna për identifikimin dhe kapjen e personave të tjerë të përfshirë në këtë veprimtari kriminale.

Materialet i kaluan Prokurorisë së Rrethit Gjyqësor Tiranë, për veprime të mëtejshme, për veprën penale “Prodhimi dhe shitja e lëndëve narkotike”.

(BalkanWeb)