Gazetarja Klodiana Lala raporton për BalkanWeb pasuritë e sekuestruara në Tiranë që i përkasin një personi me emrin Sokol Marku, nga Mirdita i dënuar për trafik droge në Shqipëri, por në bazë të informacioneve merret dhe me trafik drejt Italisë.

18 automjete, 2 lokale, 10 pasuri të paluajtshme si njësi tregtare vila apo apartamente me vlerë totale prej rreth 5 milion euro janë vendosur tashmë me vendim të Prokurorisë Tiranë nën sekuestro preventive, teksa mësohet se të përfshirë janë dhe familjarë të tij.

Bëhet me dije se në Tiranë Marku ka njësi me sipërfaqe 53.6 m2, truall me sipërfaqe 1261 m2, ndërtesë me sipërfaqe 150 m2, apartament me sipërfaqe 50 m2, truall me sipërfaqe 412.3 m2 dhe ndërtesë me sipërfaqe 173.8 m2, apartament në Kavajë me sipërfaqe 70 m2, dhe në Qerret një lavazh.

Sekuestrohet dhe një biznes me sipërfaqe trualli 3 mijë e 600 m2 dhe ndërtim 260 m2 në rrugën ”Dora Distria”.

Po ashtu në rrugën ”Shaqir Hoshafi” sekuestrohet biznesi me sipërfaqe 115 m2, në rrugën e Dibrës ndërtesë 3-katëshe. Bëhet fjalë për një skemë pastrimi parash, nga Sokol Marku dhe vëllai binjak që pastronin para me fajde në Spanjë e vende të BE.

Sokol Marku i rezulton më parë dy herë i dënuar në Shqipëri, njëherë me 5 vite burg ng Gjykata e Tiranës në 2013 për ”Prodhim e shitje e narkotikëve”, si dhe 1 muaj burg për kundërshtim të një punonjësi që kryen shërbim publik në 2016 nga Apeli i Tiranës.

(BalkanWeb)

Për t’u bërë pjesë e grupit "Balkanweb" mjafton të klikoni: Join Group dhe kërkesa do t’ju aprovohet menjëherë. Grupi Balkanweb