E ftuar në emisionin “Alert” në News24 nga Granit Sokolaj, drejtoresha ekzekutive e Qendrës “Konsumatori Shqiptar”, Ersida Teliti ka folur për “Akademinë e Konsumatorit”, si projekt në formë mësimëdhënie për informimin dhe ndërgjegjësimin e konsumatorit për sigurinë ushqimore dhe jo vetëm. Ajo deklaroi se ky projekt në bashkëpunim me Fondacionin Fridrish Ebert Shtifung në Tiranë u zhvillua online për shkak të pandemisë së coronavirusit dhe pati pjesëmarrës nga e gjithë Shqipëria.

“Akademia e Konsumatorit u zhvillua për të dytin vit dhe erdhi si një projekt i Qendrës Konsumatori Shqiptar në bashkëpunim me Fondacionin Fridrish Ebert Shtifung në Tiranë. Erdhi si një nevojë dhe domosdoshmëri e mungesës së informimit dhe ndërgjegjësimit të konsumatorit në nivele të ndryshme. Rreth 27 pjesëmarrës ndoqën leksionet, por këtë vit u zhvillua online për shkak të pandemisë dhe pati pjesëmarrës nga e gjithë Shqipëria. 27 pjesëmarrës ndoqën 27 leksione online për tema të ndryshme, për produkte ushqimore dhe joushqimore, për mbrojtjen e konsumatorit në nivel të qeverisjes vendore, për lidhjen e medias me konsumatorin, mosdiskriminimin etj. Pra kanë mësuar gjëra që nuk i dinin, pasi një konsumator i mirë është një konsumator jo që vetëm ka informacion, por di edhe të ankohet”-tha Teliti.

Teliti e cilëson si një nga projektet më të suksesshme për mbrojtjen e konsumatorit dhe se synimi kryesor është informimi i tij mbi çështje të ndryshme dhe të dijë se ku të adresojë ankesat.

“Ishte një paketë e plotë trajnimesh, nga eksperienca mendojmë se është një nga projektet më të suksesshem që Qëndra “Konsumatori Shqiptar” ka zhvilluar. Pjesëmarrësit kanë mësuar informacione që nuk i dinin dhe ne synojmë ngritjen e shpirtit të ankesës. Bashkia e Tiranës ka qenë më në avancë se bashkitë e tjera. Problem mbetet fakti se në të gjitha bashkitë përveç Tiranës dhe Durrësit, nesë u kërkon të drejtë për informacion, qeverisja vendore nuk e ka të qartë kuadrin ligjor. Duhet ndërgjegjësim për ngritjen e një zyre për mbrojtjen e konsumatorit, që në momentin kur ka ankesa, ky sektor t’i drejtojë në vendin e duhur-u shpreh Ersida Teliti.

Teliti flet për ankesat e konsumatorëve gjatë periudhës së pandemisë dhe se si do vijojë punën Akademia e Konsumatorit.

“Pjesa e Akademisë konsiston tek konsumatorët, të cilët nuk janë të qartë se ku duhet të ankohen. Ankesat në fakt bëhen në rrjete sociale, jo te institucionet. Gjatë pandemisë, kishte ankesa për tregtinë online që është zhvilluar shumë gjatë asaj periudhe. Pagesa 2-3 herë e postës, pasi kanë marrë mall të dëmtuar, siguria ushqimore mbetet sfida jonë. Kam patur ankesa edhe për telefonitë celulare dhe për shërbimet e paketave televizive, të cilat po i trajtojmë brenda strukturës së organizatës. Ankesa ka patur edhe për paketat turistike dhe dëmi që i është shkaktuar konsumatorit shqiptar, apo anulimi i fluturimeve, nuk kanë informacionin se ku të ankohen dhe mungesa e dëmshpërblimit apo një pjesë I është kthyer një shumë e vogël.

Vazhdon të jetë ende mendimi se institucioni nuk kthen pergjigje. Nga dy vitet e Akademisë, kanë qenë 54 pjesëmarrës, shkon edukimi te e gjithë familja. Shumë nga pjesëmarrësit e Akademisë së dytë vijnë nga feedback pozitiv i Akademisë së parë. Akademia do vazhdojë edhe me një fazë të dytë, po pregatisim 4 fletëpalosje ku të rinjtë do t’i shpërndajnë në vendet përkaëse për të rritur ndërgjegjësimin e konsumatorit”-deklaron Teliti.

(BalkanWeb)

Për t’u bërë pjesë e grupit "Balkanweb" mjafton të klikoni: Join Group dhe kërkesa do t’ju aprovohet menjëherë. Grupi Balkanweb
Etiketa: