Pritjes për ta i erdhi fundi, pasi sot do të takohen me vogëlushët e tyre, të cilët u dërguan vite më parë drejt Sirisë. Teksa pritet që nga momenti në moment avioni i nisur nga Libani, ku në bord është dhe kryeministri Edi Rama, të zbresë në Atdhe me 4 fëmijë shqiptarë dhe një grua e plagosur, që ishin në kampin famëkeq të Al-Holit në Siri, familjarët e tyre presin me ankth në aeroportin e Rinasit.
Në një lidhje direkte për gazetaren ‘News24’ Dorjana Bezat, ka folur daja i Eva dhe Endri Dumanit, Agim Ndregjoni, i cili pret me padurim që të përqafojë nipin e tij pas shumë vitesh, ndërkohë riatdhesimi i mbesës nuk është bërë i mundur dot.
Ndregjoni tha për mediat se: “Mezi po presim me padurim që ata të jenë në gjirin e familjes. Do respektojmë procedurat ligjore për trajtimin e këtyre fëmijëve.”. Mes të tjerash ai i bëri thirrje dhe mbesës së tij që ajo ti bashkohet forcave që e kërkojnë dhe që të mbërrijnë në Shqipëri, ku e pret një jetë e qetë dhe e lumtur. Ndërkohë, Bezat ka siguruar dhe disa plane ku shihet nëna e Endri Dumanit, e cila përgjatë gjithë kohës nuk mund t’i ndalë lotët dhe qan me ngashërim. Të shpëtuarit nga kampi Al-Hol pas mbërritjes në Shqipëri do të transportohen në një qendër të posaçme në Durrës ku do të marrin trajtim psikologjik dhe shëndetësor në një afat të pacaktuar.
(BalkanWeb)