Alexander Lukashenko ka siguruar një mandat të shtatë pesëvjeçar si president i Bjellorusisë në një fitore të fuqishme zgjedhore, të cilën qeveritë perëndimore e kanë refuzuar si një farsë.
Lukashenko fitoi 86.8% të votave në zgjedhjet e së dielës, sipas rezultateve të publikuara nga komisioni zgjedhor i vendit.
Politikanët evropianë deklaruan se votimi nuk ishte as i lirë dhe as i drejtë, sepse mediat e pavarura janë të ndaluara në ish-republikën sovjetike dhe të gjitha figurat kryesore të opozitës ose janë burgosur ose janë detyruar të ikin jashtë vendit.
“Populli i Bjellorusisë nuk kishte zgjidhje tjetër. Është një ditë e hidhur për të gjithë ata që dëshirojnë lirinë dhe demokracinë,” postoi ministrja e Jashtme gjermane Annalena Baerbock në X.
Udhëheqësja e opozitës në mërgim, Sviatlana Tsikhanouskaya bëri thirrje për zgjerimin e sanksioneve perëndimore kundër kompanive dhe individëve bjelloruse të përfshirë në shtypjen e kundërshtarëve të Lukashenkos dhe furnizimin me municione për përpjekjet luftarake të Rusisë në Ukrainë.
“Për sa kohë Bjellorusia është nën kontrollin e Lukashenkos dhe Putinit, do të ketë një kërcënim të vazhdueshëm për paqen dhe sigurinë e të gjithë rajonit”, tha ajo.
Shefja e punëve të jashtme të BE-së Kaja Kallas dhe komisionerja e Zgjerimit Marta Kos kanë reaguar gjithashtu duke thënë në një deklaratë se blloku do të vazhdojë të vendosë “masa kufizuese dhe të synuara kundër regjimit” duke mbështetur shoqërinë civile dhe opozitën në mërgim.
(BalkanWeb)
