Presidenti i FSHF-së Armand Duka ka reaguar pas kualifikimit të ekipit të femrave të Vllaznisë për në turin e dytë kualifikues të UEFA Women’s Champions League pas një fitoreje drithëruese ndaj kampiones së Turqisë, ALG Spor Kulubu që u vendos nga penalltitë.
Duka shprehet i lumtur me këtë fitore që e quan një arritje të shkëlqyer për vajzat kuqeblu.
“Jashtëzakonisht i lumtur me fitoren e sotme të Vllaznisë në turin e parë kualifikues të UEFA Women’s Champions League ndaj kampiones së Turqisë, ALG Spor Kulubu! Ka qenë një ndeshje vërtetë emocionuese dhe e luftuar deri në fund.
Një arritje e shkëlqyer për vajzat kuqeblu, por edhe për futbollin e femrave. Le të shpresojmë që ky sukses të pasohet nga të tjera triumfe dhe Vllaznia të avancojë në fazën e grupeve të Champions League për femra.
Do të ishte një sukses i merituar për këtë ekip, por që njëkohësisht tregon se futbolli i femrave në Shqipëri është rritur në aspektin cilësor vitet e fundit.
Urimet më të mira për drejtuesit e klubit, stafin teknik dhe shpresoj që Vllaznia të vazhdojë të jetë një burim frymëzimi për të gjitha vajzat që duan të luajnë futboll! Jemi krenar për ju!”, shkruan Duka.
