PUKE- 16 mijë fidanë të rinj gështenjash i shtohen fondit pyjor në Pukë. Ministri i Turizmit dhe Mjedisit, Blendi Klosi ishte i pranishëm në njësinë administrative Qerret për të finalizuar mbjelljen e 4 mijë fidanëve të parë, mundësuar nga projekti holandez CNVP dhe bashkia Pukë në kuadër të Programit të Gjelbërimit të vendit.

Ministri Klosi tha se projekti për mbjelljen e 20 milionë e 200 mijë fidanëve deri në vitin 2020, jo vetëm që synon pyllëzimin e Shqipërisë por i shërben drejtpërsëdrejti komunitetit duke forcuar ekonominë nëpërmjet rritjes së punësimit dhe prodhimit. Territoret e braktisura dhe të degraduara kërkojnë vëmendje të veçantë nga biznesi pasi ato përbëjnë një potencial të lartë për zhvillimin e sektorit pyjor dhe agropyjor dhe forcon ekonominë e familjeve fermerë në zonat më të thella të vendit.

“Jemi këtu në një zonë të lënë shumë larg vëmendjes së bizneseve, ndaj kemi ardhur së bashku me një grup të madh ekspertësh për t’i rikthyer një ndjesi shumë pozitive kësaj zone, për të mbjellë 4 mijë fidanët e parë, për të dhënë 4 mijë mundësi më shumë për ekonominë familjare të kësaj zone dhe po ashtu për të vazhduar projektin tonë për të pyllëzuar sa më shumë Shqipërinë”, tha Klosi.

Nga projekti përfitojnë punësim sezonal 100 vetë ndërsa familjet e zonës do të kenë një prodhim shumëfish më të lartë.

Kreu i Turizmit dhe i Mjedisit shprehu bindjen se në Ditët e Pemëve, më 23-24 shkurt në të gjithë vendin do të ketë një përfshirje shumë të madhe të qytetarëve për të mbjellë më shumë pemë, me qëllim krijimin e një mjedisi të shëndetshëm dhe një ekonomie më të fortë. Mbështetjen e pushtetit lokal në zbatimin e programit të mbjelljes së pemëve, e dha prefekti i qarkut Shkodër ndërsa përfaqësuesi CNVP- së, shprehu gatishmërinë e projektit holandez për të vijuar zbatimin e plotë të projektit dhe ndihmën për banorët e zonës.

Gështenjat janë nga të vetmet pemë më produktive të kësaj zone dhe kërkesa e tregut ka rritur interesin e banorëve për t’i kultivuar duke shndërruar tokat inproduktive në dobi të përmirësimit të ambientit dhe ekonomisë lokale. Mbjellja e 16 mijë fidanëve të gështenjave përfundon në fund të këtij muaji duke i shtuar fondit pyjor 35 hektarë pyllëzim.

(BalkanWeb)

Për t’u bërë pjesë e grupit "Balkanweb" mjafton të klikoni: Join Group dhe kërkesa do t’ju aprovohet menjëherë. Grupi Balkanweb