Forcat pakistaneze të sigurisë duke vepruar në bazë të inteligjencës arrestuan një grua që dyshohet se po planifikonte sulme ndaj kinezëve që punonin në projektet e ndërtimit në jugperëndim, thanë autoritetet të hënën.

Arrestimi u njoftua nga departamenti kundër terrorizmit në provincën Baluchistan. Në një deklaratë, thuhet se gruaja është një anëtare e Ushtrisë Çlirimtare të Baluchistanit, një grup separatist. Grupi mori përgjegjësinë për një sulm të 26 prillit pasi një kamikaze femër  vrau tre mësuese kineze dhe shoferin e tyre pakistanez në Universitetin e Karaçit.

Arrestimi i së hënës erdhi disa orë përpara se kryeministri pakistanez Shahbaz Sharif në një bisedë telefonike me homologun e tij kinez Li Keqiang të shprehte ngushëllimet e tij për vrasjet e prillit dhe të premtonte siguri maksimale për kinezët që punojnë në Pakistan.

Mijëra inxhinierë, ekspertë dhe punëtorë kinezë po punojnë në projektet e nisura në Pakistan vitet e fundit për Korridorin Ekonomik Kinë -Pakistan, i cili është pjesë e iniciativës shumë miliarda dollarëshe të Kinës.

Ndërkohë, një bombë në anë të rrugës shpërtheu pranë një furgoni policie në qytetin port jugor të Karaçit të hënën, duke vrarë një kalimtare grua dhe duke plagosur 13 të tjerë, tha zyrtari i lartë i policisë Ali Mardan Khoso.

Askush nuk e mori menjëherë përgjegjësinë për sulmin, por dyshimi ra mbi militantët separatistë në Baluchistan, të cilët kanë zhvilluar një kryengritje të nivelit të ulët atje.