GENOVA- Kjo foto e shkrepur nga Google Earth është bërë virale në internet menjëherë pas rënies së urës Morandi në Genova. Në foto shihet njëra këmbë e urës që duket e mbështetur në bordurën e sipërme të një prej pallateve të ndërtuara nën të.
“Por kush është ndërtuar më parë: ura apo pallati?”, kërkon të dijë një përdorues. Një tjetër pyet: “Si mund të jetonin familjet në kushte të tilla mes zhurmës dhe ajrit kaq shumë të ndotur?”.
Një fotografi që ka shkaktuar indinjatë. “Po vetëm tani e vunë re të gjithë?”, komenton një banor i zonës. “Është e turpshme, vetëm zemërim dhe dhimbje”, shkruan një përdorues tjetër.
38 persona humbën jetën pas shembjes së urës së ndërtuar në vitet ’60 në Genova, pjesë e autostradës A10. Ngjarja ndodhi të martën, ndërsa ende ka persona të zhdukur. Mbi 600 banorë janë shpërngulur nga banesat nën urë, për të shmangur ndonjë tragjedi tjetër.
(m.k/BalkanWeb)
