LAC – Përmbytjet e vazhdueshme gjatë ditës së sotme kanë shënuar  një viktimë në qytetin e Laçit. Burime nga policia bëjnë me dije se ka humbur jetën 48-vjeçari, K. Menga.  Trupi i pajetë është gjetur nga policia rreth 300 metra nga vendi i quajtur “Kodra e Bushit” në Laç, në një kanal. 48-vjeçari banues në Laç, ishte duke mbrojtur biznesin e tij.

Kol Menga punonte prej disa vitesh në tregun e Laçit duke treguar rroba të përdorura. Mbrëmjen e djeshme, pasi filluan reshjet e dendura të shiut dhe rreziku ishte tepër i madh, që prurjet e përroit të përfshinin edhe biznesin e tij të vogël, 48-vjecari shkoi për të zhvendosur mallin.

Gjatë tentativës për të hequr mallin, 48-vjeçari është përpirë nga dallgët e përroit që kalon përmes qytetit.

Gjatë tentativës për të hequr mallin, 48-vjeçari është përpirë nga dallgët e përroit që kalon përmes qytetit.

Ngjarja ka ndodhur pranë qendrës së qytetit pasi dalja e përroit nga shtrati ka rrezikuar edhe kalimtarët. Nga kryerja e veprimeve hetimore rezulton se ngjarja ka ndodhur në mënyrë aksidentale si pasojë e mbytjes në ujë.

Sakaq, nuk është hera e parë që Laçi përballet me situata të tilla. Në nëntor të 2014-s, babë e bijë humbën jetën pasi i mori rrjedha e ujit që u krijua nga shirat.

Në këtë situatë të krijuar nga reshjet e dendura të shiut, në Laç, janë angazhuar forcat policore të Komisariatit të Policisë Kurbin në bashkëpunim me grupe të FNSH-së Shkodër me qëllim ndihmën në evakuimin e banorëve si dhe në çdo rast tjetër në nevojë.

Ndërkohë që në Kurbin situata nga përmbytjet vijon të jetë problematike. Sipas raportimeve nga terreni, 50 banesa janë përmbytur në laç. Ndërkaq në Milot janë evakuuar 6 familje të rrezikuara nga përmbytjet.
Po ashtu bëhet e ditur se dhjetërsa hekratë sipërfaqe toke janë nën ujë. Reshjet kanë vijuar gjatë gjithë natës dhe në orët e para të ditës së sotme.

(m.k/fl.na/BalkanWeb)