LYON
Një agresor i armatosur me një armë gjahu të shtunën plagosi një prift ortodoks në të shtënat në qytetin francez të Lyon para se të arratisej, tha një burim policie.
Prifti 52-vjeçar, i cili ka kombësi greke, po mbyllte kishën e tij rreth orës 4 pasdite me kohën lokale (3 pasdite GMT) kur u qëllua dy herë dhe po trajtohet në vend për dëmtime kërcënuese për jetën, tha burimi, i cili kërkoi të mos përmendet me emër.
Policia mbylli lagjen përreth kishës dhe paralajmëroi publikun në Tëitter të qëndronte larg vendngjarjes. Ndërsa ra nata në Lyon, furgoni i policisë dhe automjetet e urgjencës mund të shiheshin në imazhet e treguara në televizionin francez.
Arsyeja e sulmit ishte e paqartë
Incidenti erdhi tre ditë pasi një burrë që bërtiste “Allahu Akbar!” (Zoti është më i madhi) vrau tre persona të tjerë në një kishë në Nisë dhe dy javë pasi një mësuesi në një shkollë në një periferi të Parisit iu pre koka nga një çeçen 18-vjeçar, me sa duket i zemëruar nga mësuesi, që kishte treguar një karikaturë të Profetit Muhamed në klasë.
Ministrat francezë kishin paralajmëruar që sulme të tjera militante islamike mund të ndodhnin. Pas sulmit vdekjeprurës në Nisë, Presidenti Emmanuel Macron njoftoi rritjen e mbikëqyrjes së vendeve të adhurimit nga forca ushtarake e Francës në rrugë, e cila do të forcohet në 7 000 trupa nga 3 000 që kishte. Siguria në shkolla gjithashtu do të rritet, tha ai.
Ministri i Jashtëm Jean-Yves Le Drian ka paralajmëruar që qytetarët francezë përballen me një rrezik sigurie “kudo që janë”, duke thënë se alarme u ishin dërguar të gjithë shtetasve francezë jashtë vendit.
Franca hyri në një bllokim të dytë të koronavirusit të premten, por qeveria ka përjashtuar vendet e adhurimit deri të hënën, duke i lejuar ata të festojnë Ditën e Të Gjithë Shenjtorëve të Krishterë të dielën.
Vendi ka qenë në gatishmëri të lartë që nga masakra e janarit 2015 në revistën e përjavshme satirike Charlie Hebdo, që shënoi fillimin e një vale sulmesh xhihadiste që kanë vrarë më shumë se 250 njerëz. Tensionet janë rritur që nga muaji i kaluar kur u hap gjyqi për 14 bashkëpunëtorë të dyshuar në atë sulm.
(d.xh/ Balkanweb)
