Greqia ka frikë se nga Turqia do të arrijnë valë të reja refugjatësh dhe ka nisur flotën e saj luftarake në kufirin detar. Përhapja e shfrenuar e virusit Corona në Turqi përbën një shqetësim shtesë.

Për qeverinë në Athinë, nuk është vetëm një thashethem: ka informacione që Turqia ka transferuar migrantë nga pjesët e brendshme të vendit për në brigjet e Egjeut, shpjegon Ministri i Mbrojtjes i Greqisë, Nikos Panagiotopoulos, në një intervistë për stacionin televiziv Skai. Këta njerëz do të përpiqen të arrijnë në ishujt Grekë të Chios, Samos dhe Lesbos me varka dhe të hyjnë kështu në BE.

Prandaj për të gjitha forcat e sigurisë si tokësore dhe detare, ka një urdhër të qartë paralajmëron ministri: hyrja në vend e njerëzve në mënyrë të paligjshme duhet të parandalohet. Greqia do të ndërtojë “mure lundruese” në Egje për të parandaluar ardhjet e reja, raporton gazeta e Athinës Kathimerini pa përmendur detaje.

Edhe mediat gjermane kanë njoftuar për transferim migrantësh në brigjet e detit Egje gjatë ditëve të kaluara. Sipas informacioneve të gazetës Die Welt autoritetet turke kishin transferuar vetëm gjatë fundjavës së Pashkëve 2.000 vetë nga një kamp internimi në Osmaniye për në rajonin e Izmirit, që shtrihet në Detin Mesdhe, dhe u kishin sugjeruan që të largohen për në Greqi.

Një krizë e dytë refugjatësh në kufirin e jashtëm të BE?

Me sa duket Turqia dëshiron të shkaktojë një krizë të dytë refugjatësh në kufirin e jashtëm të BE. Që në muajin shkurt ka pasur përleshje të dhunshme në vendkalimin Kastanies/Pazarkule në kufirin greko-turk. Autoritetet turke nisën asokohe mijëra migrantë përmes lumit kufitar Evros me premtimin se do të lejoheshin të hynin në BE. Pas skenave tronditëse në kufi, Greqia mbylli si rezultat kufirin dhe pezulloi gjithashtu për një muaj ligjin për azil – gjë që sipas organizatave të të drejtave të njeriut është një shkelje të drejtës ndërkombëtare civile.

Virusi Corona e ndez më tepër situatën
Përhapja e shpejtë e virusit Corona në Turqinë fqinje e shton edhe më tepër shqetësimin në Greqi. Duke iu referuar “qarqeve të informuara” e përditshmja e Athinës Ta Nea shprehet për një “marifet” të supozuar të qeverisë turke për të sjellë në Greqi migrantë të infektuar. Jorgos Katrougalos, zëdhënësi për politikën e jashtme i partinë e majtë në opozitë Syriza, e akuzon qeverinë konservatore nën kryeministrin Kyriakos Mitsotakis se po nxit frikën ndaj emigrantëve në radhët e popullësise greke dhe se po i paraqet refugjatëve jo si viktima, por si një kërcënim për shëndetin publik. “Qeveritarët nuk kanë guximin të shprehen hapur me retorikën e tyre të djathtë dhe në vend të kësaj u japin me synim mediave informacione sekrete,” tha Katrougalos në një intervistë për radio.

Europarlamentarja konservatore, Eliza Vozemberg nuk e pranon këtë. Kjo qeveri asnjëherë nuk ka thënë në asnjë formë se të gjithë refugjatët janë kërcënim, tha eurodeputetja nga Athina për DW. Nuk ka asnjë provë që Turqia ka mbledhur me qëllim emigrantë të infektuar dhe do t’i dërgojë ata në Greqi. Sidoqoftë: “Nëse kur mblidhen mijëra vetë, është plotësisht e mundur që disa prej tyre të jenë të sëmurë tani që virusi po përhapet në Turqi”, thotë Vozemberg. Po ashtu ajo shton se nuk mund të pritet që autoritetet turke t’i kenë testuar të gjithë migrantët për virusin.

Për t’u bërë pjesë e grupit "Balkanweb" mjafton të klikoni: Join Group dhe kërkesa do t’ju aprovohet menjëherë. Grupi Balkanweb