BERLIN
Gjermania kritikoi sot Egjiptin për arrestimin e punonjësve të Anadolu Agency gjatë një bastisjeje në zyrën e saj në Kajro.
“Zyra e Jashtme gjermane është e shqetësuar për bastisjen e agjencisë turke të lajmeve Anadolu në Kajro dhe arrestimin e 4 punonjësve”, ka thënë për AA, zëdhënësi i Ministrisë së Jashtme.
“Shpesh kemi shprehur shqetësimet tona për situatën e lirisë së shtypit në Egjipt. Ne besojmë se shtypi i lirë dhe i larmishëm është jashtëzakonisht i rëndësishëm për një sistem shoqëror që funksionon. Ai mundëson dialog dhe shkëmbime dhe kështu kontribuon në stabilitetin dhe zhvillimin”, tha zëdhënësi.
Policia egjiptiane të martën bastisi Zyrën e AA-së në Kajro dhe vendndodhja e të arrestuarve, përfshirë një shtetas turk, mbetet e panjohur.
Ankaraja dënoi sulmin dhe bëri thirrje për lirimin e menjëhershëm të 4 punonjësve.
Marrëdhëniet politike të Turqisë me Egjiptin kanë mbetur të ashpra që nga viti 2013, kur tashmë i ndjeri Mohamed Morsi, presidenti i parë i zgjedhur në mënyrë demokratike i Egjiptit dhe udhëheqësi i Vëllazërisë Muslimane, u rrëzua me një grusht shteti të përgjakshëm ushtarak.//AA