Ministri gjerman i Mbrojtjes Boris Pistorius njoftoi një paketë të re ndihme ushtarake për Ukrainën me vlerë rreth 500 milionë euro, duke folur para gazetarëve në bazën ajrore të Forcave Ajrore të SHBA-së Ramstein në Rheinland-Pfalz, ku zhvillohet një takim tjetër i grupit të kontaktit për ndihmën e Kievit.

“Ne kemi njoftuar një paketë tjetër ndihme për këtë takim me vlerë gati gjysmë miliardë euro”, tha ai.

Paketa e re e ndihmës përfshin 10,000 predha nga stoku i Bundeswehr-it. Përveç kësaj, ajo plotëson pagesën për prokurimin e 180,000 predhave “nën iniciativën çeke”.

“Përveç kësaj, Gjermania nënshkroi një kontratë për prodhimin e 100,000 predhave 155 mm,” tha ministri.

Dërgesat do të vijnë në faza dhe do të fillojnë këtë verë, shtoi Pistorius.

Gjatë Konferencës së Sigurisë në Mynih, presidenti çek Petr Pavel tha se Praga ka gjetur një mundësi për të blerë qindra mijëra predha artilerie në vendet e treta, nëse mblidhen fondet e nevojshme. Më pas, kryeministri çek Petr Fiala bëri të ditur se kjo iniciativë tashmë është mbështetur nga 18 shtete perëndimore, me prokurimin e 300.000 predhave tashmë të konfirmuara dhe rreth 200.000 të premtuara.

Më parë, Gjermania ndau 7 miliardë euro për ndihmë për Ukrainën në buxhetin e saj për këtë vit.