Kryetari i Partisë Demokratike, Sali Berisha hodhi akuza të forta në drejtim të qeverisë sa i përket anijeve që do prodhojnë energji dhe që do stacionohen në Vlorë për dy vitet e ardhshme.

Berisha e vendosi theksin te çmimi i shtrenjtë prej 360 euro për një MWh që do të ketë energjia e prodhuar prej tyre dhe fakti se ato do të “helmojnë” Vlorën, pasi vihen në punë me mazut dhe jo me gaz siç premton qeveria.

“Ju mashtroni ato që keni shkruar. I dhatë një goditje të rëndë shtresës së mesme me çmimin e energjisë. Ju dilni e blini me çmime 2-fish 3-fish mbi bursën. Tani po sillni gjigandët e ndotjes, gjeneratorët nga Bangladeshi pa tender. I mashtroni shqiptarët se punojnë me gaz, ato punojnë me mazut dhe prodhojnë qindra tonelata squfur. Helmojnë Vlorën sikur të qarkulloni 100 makina për çdo 100 kilometër në ditë. Energjia e tyre kushton 360 euro megavati. Ju doni të vidhni, vidhni dhe vetëm vidhni shqiptarët.  Ju jeni hajdutë jo evropianë, por të planetit të hajdutërisë ndoshta jashtëtokësore”, tha Berisha.