Qeveria holandeze i drejtohet me një letër parlamentit të Holandës për çështjen e vendimit për Shqipërinë dhe Maqedoninë e Veriut për hapjen e negociatave. Kabineti qeveritar mendon se është e parakohshme hapja e negociatave duke përmendur si kushte krimin dhe ngritjen e prokurorisë së posaçme.
Ndonëse as një “Jo” as një “Po” për Shqipërinë, qeveria holandeze i kërkon parlamentit të jetë fleksibël dhe kërkon hapësirë për të negociuar më 16 tetor dhe se Shqipëria është prematurë për hapjen e negociatave.
“Qeveria mirëpret hapat radikalë që Shqipëria ka ndërmarrë tashmë në fushën e vetting-ut, në sundimin e ligjit, rritjes së operacioneve policore kundër krimit. Por Shqipëria duhet të bëjë më shumë në luftën kundër krimit të organizuar. SPAK duhet të jetë sa më shpejt funksional dhe Shqipëria të tregojë një rekord bindës në luftën kundër krimit të organizuar dhe korrupsionit. Për të përfunduar, Qeveria mendon se hapja tani e negociatave është e parakohshme”, thuhet në letrën e qeverisë për parlamentin holandez.
Vendimi i parlamentit i lë më shumë hapësirë Ministrisë së Jashtme të Holandës që në mbledhje me ministrat e tjerë të vendeve të BE-së të ketë fleksibilitet për këtë çështje.
(BalkanWeb)
