Më lejoni ta nis duke shprehur entuziazmin tim në përurimin e programit të KMSH-së për ndërtimin e komunitetit. E filluam këtë projekt së bashku në vitin 2015 për të shkatërruar grupet ekstremiste dhe për të mbrojtur demokracinë shqiptare. Për shkak të sukseseve të mëdha që Komuniteti Mysliman Shqiptar pati në përhapjen e zërit të tij për paqe dhe nxitje të vlerave demokratike, të bashkëjetesës dhe harmonisë për të rinjtë shqiptarë, KMSH e zgjeroi programin një vit më vonë. Këtë vit, programi do të rritet edhe më shumë. Ambasada e SHBA-ve është krenare që ka qenë partneri juaj në këto përpjekje dhe mbetemi entuziastë që jemi partnerët tuaj në fillimin e programit të këtij viti.

Një nga pasuritë më të mëdha kombëtare të Shqipërisë është harmonia ndërfetare – është një shembull i ndritshëm, që e gjithë bota ta ketë model. Ky respekt për lirinë fetare bashkëndahet nga Shtetet e Bashkuara dhe është një ndër arsyet e shumta se përse jemi partnerë kaq të efektshëm. Shtetet e Bashkuara janë krenare për nismën që Shqipëria ka ndërmarrë për ta vendosur veten si drejtues rajonal kundër ekstremizmit të dhunshëm. Në vitin 2015, Shqipëria tregoi udhëheqësi të guximshme rajonale duke mikpritur Samitin e parë në Ballkan kundër Ekstremizmit të Dhunshëm, duke njohur shfaqjen e një kërcënimi të ri terrorist. Qeveria e Shqipërisë ishte e para në rajon që hapi një Qendër Kombëtare Kundër Ekstremizmit të Dhunshëm dhe botoi një Strategji Kombëtare Kundër Ekstremizmit të Dhunshëm. Programi, fillimin e të cilit festojmë sot, është një shembull konkret i zbatimit nga aktorët vendës të asaj strategjie për të sjellë ndryshim. Komuniteti Mysliman Shqiptar është një zë i besueshëm dhe paqësor në Shqipëri. Kur ai flet, bashkësitë dëgjojnë.

Siç e dini, afro 300 burra, gra dhe fëmijë shqiptarë kanë udhëtuar drejt Sirisë dhe Irakut për të luftuar për ISIS-in ndërmjet viteve 2013 dhe 2015. Disa prej tyre vdiqën duke luftuar, disa janë kthyer dhe disa mund të kthehen një ditë. Mënyra se si Shqipëria punon për t’i riintegruar këta shqiptarë përsëri në strukturën kulturore dhe sociale të shoqërisë do të jenë vendimtare në formësimin e së ardhmes. Ky projekt përfaqëson një hap të rëndësishëm në atë përpjekje.

Jemi të entuziazmuar që përurojmë këtë projekt së bashku, i cili do t’i shtohet punës që KMSH ka filluar tashmë për të ndërtuar komunitete të qëndrueshme, për të zhvilluar aftësitë e të menduarit kritik midis të rinjve dhe për të mbrojtur vlerat demokratike. Çdo person në këtë sallë sot luan një rol të rëndësishëm për të parandaluar dhe luftuar ekstremizmin e dhunshëm. Pavarësisht nëse jeni zyrtar i qeverisë, anëtar i autoriteteve ligjzbatuese, udhëheqës fetar, këshilltar i komunitetit apo përfaqësues i shoqërisë civile, ndodheni këtu sepse i kuptoni sfidat me të cilat përballemi. Ju e kuptoni që jemi në një betejë idesh – një përballje e vlerave tona të pluralizmit, të pranimit, të demokracisë dhe të harmonisë kundër një ideologjie dhune, intolerance, përjashtimi dhe abuzimi të njerëzimit.

Në Departamentin e Shtetit, ne jemi të përqendruar në përafrimin e përgjigjeve civile me ato të ligjzbatimit dhe ato ushtarake. Zbatuesit e këtij projekti e dinë – ne jemi të angazhuar në një përballje idesh. E di që të gjithë ju jeni kundër dhunës dhe do të ndihmoni për të bindur të tjerët se jemi të njëjtë në atë që duam për familjet tona dhe bashkësitë tona – idetë e lirisë, të begatisë, të paqes dhe të harmonisë.

* Fjala e të ngarkuarës me punë në projektin “Angazhimi i të Rinjve për Ndërtimin e një Komuniteti të Qëndrueshëm”

Për t’u bërë pjesë e grupit "Balkanweb" mjafton të klikoni: Join Group dhe kërkesa do t’ju aprovohet menjëherë. Grupi Balkanweb