TIRANE
Hetimeve për dëmet që la pas tërmeti i 26 nëntorit në vend, do t’i shtohen edhe 7 ekspertë italianë. Gazetarja Klodiana Lala tha për “BalkanWeb” se ekipi i ekspertëve italianë ka mbërritur tashmë në Shqipëri dhe do të asistojë Prokurorinë e Durrësit në hetimet për tërmetin shkatërrimtar.
Vizita në Tiranë u krye me kërkesë të Prokurorit të Përgjithshëm z.Olsian Çela, me ndihmën e misionit Pameka në Shqipëri. Delegacioni kryesohej nga dy prokurorë të prokurorisë së Aquilas z. Fabio Picuti dhe z. Michele Renzo. Qëllimi i vizitës është dhënia e asistencës teknike mbi hetimet që lidhen me pasojat e tërmetit të datës 26 Nëntor 2019. Ata u takuan sot me kryeprokurorin Çela, ndërsa nesër do të zbarkojnë në Durrës. Ekspertet kanë qenë pjesë e hetimeve që nisën në Itali pas tërmetit në L’Aquila, ku gjithashtu pati viktima në njerëz e dëme të konsiderueshme materiale.
Delegacioni Italian përfaqësohet nga 2 prokurorë të Aquilas përgjegjës për hetime të ngjashme në Itali, një inxhinier si edhe 2 oficerë të policisë gjyqësore.
51 persona humbën jetën në vend nga tërmeti i 26 nëntorit, ndërsa shkatërroi qindra banesa në Tiranë, Durrës e Thumanë. Në qytetet e prekura nga tërmeti prokuroria ka nisur hetimet për veprat penale “Shpërdorim Detyre”, “Ndërtim pa leje” dhe “Dhënia e ndihmës për ndërtim pa leje”.
(BalkanWeb)
